Ka dështuar të mbahet seanca e paraparë për të enjten në Gjykatën Themelore në Prishtinë, në rastin “Stenta 2”, ku për korrupsion po gjykohen 42 mjekë të spitaleve publike të Kosovës.
Shkak i dështimit të seancës ka qenë mungesa e anëtarit të trupit gjykues, Shashivar Hoti, për të cilin, kryetarja e trupit gjykues, Shadije Gërguri tha se ka pasur rast vdekje në familje, andaj nuk ka mundur të prezantojë në këtë seancë.
Për shkak të mungesës së gjykatësit Hoti, gjykatësja Gërguri tha se nuk do të mbahet as seanca e paraparë për 20 shtator, ndërsa seanca e radhës është caktuar të mbahet më 27 shtator 2019, nga ora 10:30.
Ndryshe, në seancën e së enjtes ishte paraparë të dëshmonin dëshmitarët Mustafa Huduti dhe Sheqir Halimi të cilit ishin prezent në seancë, ndërsa, munguan dëshmitarët tjerë që ishin paraparë të dëshmonin, Destan Berisha, Latif Cenkaj, Qemajl Idrimi dhe Zylfije Halimi.
Për këtë të fundit, gjykatësja Gërguri tha kanë marr një e-mail informues nga i biri i saj, i cili i kishte informuar se dëshmitarja Halimi nuk mund të prezantojë në seancë për shkak të gjendjes së saj shëndetësore.
Në rastin “Stenta 2”, kanë qenë të përfshirë 45 mjekë, por për shkaqe shëndetësore, gjatë seancave të kaluara ishte veçuar procedura për të akuzuarit Ferid Susuri, Murat Abazi dhe Ferihane Sefa.
Me akuzat e PSRK-së në këtë rast, tashmë janë duke u përballur 42 të akuzuar, përkatësisht, Gani Bajraktari, Nexhmi Zeqiri, Daut Gorani, Elfedin Muhaxheri, Reshat Emra, Hamza Selmani, Ismajl Avdimetaj, Sali Shala, Nehat Rexhepaj, Agron Besimi, Petrit Ademaj, Bajram Mziu, Agron Leka, Driton Miftari, Besim Guda, Mirdi Strana, Shemsedin Shabollari, Fisnik Hima, Luan Pazhari, Galin Berisha, Bajram Preteni, Lulzim Kamberi, Sami Gjoka, Faik Shatri, Ejup Pllana, Florim Sadiku, Halim Halili, Agim Krasniqi, Hajdin Çitaku, Edmond Haliti, Besnik Koliqi, Afrim Poniku, Banush Gashi, Nebih Musliu, Dardan Koqinaj, Xhevdet Krasniqi, Lazër Prekpalaj, Rexhep Manaj, Kelmend Pallaska dhe Arlind Batalli.
Këta të akuzuar ishin deklaruar të pafajshëm në lidhje me akuzat për të cilat ngarkohen nga ana e Prokurorisë Speciale të Republikës së Kosovës (PSRK), në shqyrtimin fillestar që ishte mbajtur për këtë rast, në shkurt të vitit 2018.
Në këtë rast, të përfshirë kishin qenë edhe ish-ministri i Shëndetësisë (MSH), Ferid Agani, ish-sekretari i MSH-së, Gani Shabani dhe 11 të akuzuar të tjerë, mirëpo, rasti ishte veçuar në tri pjesë në shqyrtimin fillestar.
Gjykimi ndaj ish-ministrit Agani dhe ish-sekretarit Shabani tashmë ka përfunduar në shkallë të parë. Agani është dënuar me 2 vjet e 6 muaj burgim efektiv, ndërsa Shabani është dënuar 2 vjet burgim efektiv. Kurse, procesi gjyqësor në rastin “Stenta 3”, ku janë të përfshirë kryesisht, drejtorë e mjekë të spitaleve private është ende në fazën fillestare.