Ka dhënë dorëheqje zëvendësdrejtori i Institutit të Mjekësisë Ligjore në Prishtinë, Naim Uka
“Po, kam dhënë dorëheqje morale”- i tha Uka shkurt Nacionales.
E dorëheqja e Ukës ka ardhur pas raportimit se në IML- saktësisht në laboratorin e toksikologjisë – janë zhdukur disa mostra me epruveta të ish-aktivistit të Vetëvendosjes, Astrit Dehari.
Për këtë çështje, ministrja e Drejtësisë, Albulena Haxhiu, të enjten, përmes një konference të jashtëzakonshme, njoftoi se mostrat e ish-aktivistit të LVV-së, Astrit Dehari, janë zhdukur nga laboratori i toksikologjisë në kuadër të Institutit të Mjekësisë Ligjore.
“Në mbajtëset e epruvetave kanë qenë 15 epruveta me gjak, 1 epruvetë e urinës dhe 1 epruvetë e lukthit. Nga kjo, dy epruveta ia kanë dhënë Instututit Zvicran dhe një policisë për ADN. Aktualisht, sipas informacioneve, mungojnë 12 epruveta me gjak, 1 e urinës dhe 1 e lukthit. Në vendin ku rrinë epruvetat kanë qasje vetëm 3 persona, pra vetëm 3 persona i kanë çelësat ku ruhen mostrat”- tha Haxhiu.
Në orët e vona, nga Ministria e Drejtësisë njoftuan se katër zyrtarë të IML-së janë pezulluar nga puna. Bëhet fjalë për katër zyrtarë të Instituti të Mjekësisë: Nardi Sheqergjiu, Flutura Goga, Ilirjana Shala, Anila Lakna.
Por, një ditë më pas, zyrtarët policorë të Kosovës kanë dhënë hollësi për rastin. Sipas policisë, rastin e ka raportuar një zyrtare e Laboratorit të Mjekësisë Ligjore në Prishtinë.
“MANIPULIM ME PROVA/ Prishtinë, Tetor 2021-07.12.2022 Dëshmitarja femër kosovare zyrtare e Laboratorit të Mjekësisë Ligjore ka raportuar se gjatë seleksionimit, klasifikimit dhe bartjes së mostrave, kanë vërejtur se mungojnë disa mostra biologjike të një rasti. Në lidhje me rastin është konsultuar prokurori i shtetit, rasti vazhdon të hetohet nga njësitë kompetente”, thuhet në njoftimin e policisë.