Është ndryshuar Statuti i QKUK-së me çka shërbimi kardiologjik invaziv është rikthyer në kuadër të Klinikës së Kardiologjisë.
Ministri i Shëndetësisë Rifat Latifi ka nënshkruar Statutin për plotësim ndryshimin e Statutit të Qendrës Klinike Universitare të Kosovës, me propozimin e Bordit Drejtues të Shërbimit Spitalor Klinik Universitar, shkruan Gazeta Shneta.
Me plotësim-ndryshimin e këtij statuti, shërbimi kardiologjik invaziv është rikthyer në kuadër të Klinikës së Kardiologjisë, pasi i njëjti ishte zhvendosur në Klinikën e Kardiokirurgjisë në vitin 2016.
“Plotësohet dhe ndryshohet nënparagrafi 6.17 i nenit 12 të Statutit të Qendrës Klinike Universitare i miratuar në maj të vitit 2014 si në vijim: 6.17. Shërbimi klinik i Kardiokirurgjisë”, thuhet në nenin 2.
Me këtë vendim të ri të Latifit, është shfuqizuar vendimi i datës 14 nëntor të vitit 2016. Statuti i ri i QKUK-së me ndryshime do të hyjë në fuqi javën e ardhshme.
Gazeta ka pyetur edhe SHSKUK-në për implementimin e këtyre ndryshimeve, por Zyra për Media nuk ka kthyer përgjigje në adresën elektronike. Dokumentin e statutit të ri e gjeni duke klikuar në këtë vegzë STATUTI i QKUK-së.
Bordi Drejtues i SHSKUK-së kishte bërë kërkesë për këtë plotësim-ndryshim të statutit që nga viti i kaluar. Kjo kërkesë ishte kundërshtuar nga kardiologët invaziv duke i dërguar edhe një letër me peticion ish-ministrit Armend Zemaj, ku kërkohej të mos miratohej rikthimi i shërbimit në Klinikën e Kardiologjisë.
Klinika e Kardiologjisë udhëhiqet nga Lulzim Kamberi. Ndërsa Kardiokirurgjia nga ushtruesi i detyrës Rifat Brahimaj. Konkursi për këtë të fundit ishte anuluar për shkak të pritjes për plotësim-ndryshimin e statutit. /Gazeta Shneta/