Kurora lulesh janë vendosur tek varri i Dr. Fatmir Krasniqit, në 20 vjetorin e rënies së tij dhe katër anëtarëve të familjes së tij, në masakrën e Fushë Kosovës të kryer më 1 prill të vitit 1999.
Krasniqi ishte vrarë bashkë me të bijën e tij, 13 vjeçare, Blertën kurse nuk kishin shpëtuar nga krimi as vëllai i Dr. Fatmir Krasniqit, Arbeni dhe prindërit Hamit dhe Vezire Krasniqi.
Në këtë ngjarje, ndër më të rëndat në Fushë Kosovë ku u vranë 5 anëtarë të familjes Krasniqi s0i dhe katër anëtarë tjerë të familjes Syla, të gjithë këta familjarë ishin zënë robër dhe më pas ishin dërguar në një shtëpi në Fushë Kosovë, ku ku janë ekzekutuar nga policia dhe ushtria serbe.
Dr. Dafina Krasniqi, mbesa e dëshmorit Dr. Fatmir Krasniqi ka thënë se në po të njejtin vend ishin vrarë gjithsej 13 persona.
“Mes tyre pesë anëtarë të familjes tonë dhe katër të familjes Syla. Të tjerët kanë qenë pjestarë të lagjes në Fushë Kosovë”, rrëfen 20 vite pas ngjarjes, Dr. Dafina Krasniqi, familjare e të rënëve.
Plagë e rëndë për familjen për një kohë të gjatë ka qenë zhdukja e kufomave. “Kufomat e një pjese të familjes janë gjetur në vitin 2005 në Batajnicë, kurse pjesa tjetër janë gjetur në vitin 2006”, ka rrëfyer Krasniqi. Ajo ka thënë se për këtë krim, nuk është dënuar askush.
Ndryshe, për nder të sakrificës së familjes Krasniqi, Qendra Kryesore e Mjekësisë Familjare në Fushë Kosovë mban emrin e martirit Dr. Fatmir Krasniqi.