Nën moton “Dhuro gjak, dhuro jetë”, fillon Java e Dhurimit Vullnetar të Gjakut, ka filluar Java e Dhurimit Vullnetar të Gjakut.
Kështu bëri të ditur Ministria e Shëndetësisë, ku së bashku me Qendrën Kombëtare të Transfuzionit të gjakut kanë nisur aktivitetet në kuadër të kësaj fushate humanitare.
Sipas njoftimit, Java e Dhurimit Vullnetar të Gjakut shërben si një mundësi për të rritur ndërgjegjësimin mbi rëndësinë jetike të dhurimit të gjakut, një akt humanitar që shpëton jetë dhe ndihmon në trajtimin e mijëra pacientëve që kanë nevojë për transfuzione gjaku.
Në kuadër të kësaj fushate, dhjetëra nëpunës të Ministrisë së Shëndetësisë iu përgjigjën pozitivisht thirrjes për të dhuruar gjak, duke dhënë një kontribut të çmuar në sigurimin e rezervave të nevojshme për pacientët në nevojë.
Dhurimi vullnetar i gjakut mbetet burimi më i sigurt dhe më i qëndrueshëm për furnizimin e institucioneve shëndetësore me gjak dhe produkte të gjakut. Përmes këtij veprimi humanitar, qytetarët japin një kontribut të drejtpërdrejtë në shpëtimin e jetëve dhe në forcimin e sistemit shëndetësor.
“Ministria e Shëndetësisë dhe Qendra Kombëtare e Transfuzionit të Gjakut shprehin mirënjohjen për të gjithë dhuruesit vullnetarë dhe i ftojnë qytetarët që t’i bashkohen kësaj nisme humanitare, duke dhuruar gjak dhe duke ndihmuar në sigurimin e sasive të mjaftueshme për pacientët që kanë nevojë për transfuzion.” thuhet në njoftim./Gazeta Shneta/