Një nënë 32-vjeçare ka ndërruar jetë pas lindjes në Spitalin e Përgjithshëm të Gjilanit. Drejtori i spitalit ka konfirmuar rastin, ndërsa ka thënë se kolegjiumi i mjekëve është duke bërë raportin për arsyet që mund të kenë shkaktuar komplikimet që çuan në vdekjen e gruas
Një grua e rreth të 30-ve ka ndërruar jetë mbrëmë në spitalin e Gjilanit. Ajo kishte qenë shtatzënë dhe me sukses e kishte lindur foshnjën e saj, të gjinisë mashkull. Por komplikimet për 32-vjeçaren kishin nisur pas lindjes së foshnjës.
Lehona si pasojë e komplikimeve ndërroi jetë pasi që doli nga salla e operimit. Lajmin për vdekjen e kësaj pacienteje e ka konfirmuar për Gazetën Express, drejtori i spitalit të Gjianit, Nisret Hajrullahu.
“Mund të ju konfirmoj se mbrëmë fatkeqësisht ka ndërruar jetë një grua pas lindjes në spitalin e Gjilanit. Kolegjiumi mjekësor është duke e bërë raportin për të vërtetuar shkaqet që çuan në vdekjen e pacientes”, ka deklaruar për gazetën drejtori Hajrullahu.
E ndjera kishte pasur lindjen e dytë. Foshnja është në gjendje të mirë shëndetësore. Ajo la pas dy fëmijë, që të dy të gjinisë mashkullore.