Kirurgët shqiptarë nga vendet e rajonit dhe nga vendet evropiane do të mblidhen të gjithë bashkë në një vende nesër në Prishtinë
Prishtina nesër do të shndërrohet në kryeqytetin e kirurgëve të fëmijëve shqiptarë. Mjekë shqiptarë nga vendet evropiane, nga rajoni e Kosova do të mblidhen në një vend në kuadër të Simpoziumit të parë Mbarëshqiptar për Kirurgjinë e Fëmijëve, shkruan Gazeta Shneta.
Drejtori i Klinikës së Kirurgjisë së Fëmijëve, Dr. Murat Berisha, ka thënë se rëndësia e këtij simpoziumi ka të bëj me shkëmbimin e përvojave dhe thellimin e bashkëpunimit.
“Nesër do të mbahet simpoziumi i parë mbarshqiptarë i kirurgjisë së fëmijëve. Do të marrin pjesë të gjithë kirurgët e fëmijëve nga Kosova, Shqipëria, Maqedonia dhe kirurgët shqiptarë që punojnë në vendet evropiane sikurse në Austri, Zvicër, Gjermani. Rëndësia është e madhe sepse kirurgët shqiptarë mblidhen për herë të parë në një vend dhe në një kohë. Do të shkëmbehen përvojat tona të ndryshme dhe të gjata në këtë fushë”, ka deklaruar Berisha.
Berisha ka treguar se Simpoziumi organizohet në bashkëpunim me SHSKUK-në dhe Odën e Mjekëve të Kosovës.
Simpoziumi mbahet nesër në Hotel International Prishtina duke filluar nga ora 08:30. /Gazeta Shneta/
