Nga Klinika Emergjente e Qendrës Klinike Universitare të Kosovës ende nuk ka udhëtuar asnjë mjek për në Turqi.
Gjatë ditës së sotme është raportuar se mjekë të Klinikës Emergjente të QKUK-së kanë udhëtuar për në zonat e prekura nga tërmeti në Turqi për të ndihmuar të plagosurit, shkruan Gazeta Shneta.
Por së paku deri në këto momente nga Klinika Emergjente në QKUK ende nuk ka udhëtuar asnjë mjek për në shtetin turk.
Kjo është konfirmuar nga Gazeta Shneta përmes burimeve. Një prej anëtarëve të stafit mjekësor i cili është pjesë e ekipës i ka thënë Gazetës se ende nuk kanë marr informata se kur do të udhëtojnë.
“Ne jemi pjesë e ekipës së Emergjencës së QKUK-së të cilët do të udhëtojnë për në Turqi, por ende nuk kemi marr informata se kur do të nisemi”, ka thënë ai.
Në këtë ekip janë dy specialistë të mjekësisë emergjente dhe dy infermierë.
Ndërkaq drejtori i Klinikës Emergjente Dr. Naser Syla i ka thënë Gazetës se nuk ka informacione deri më tani nëse ka udhëtuar dikush nga stafi i klinikës.
Ndërkaq SHSKUK në një deklaratë të ka thënë se emrat e mjekëve të cilët do të udhëtojnë për në Turqi janë dërguar në Ministrinë e Shëndetësisë. Nga Zyra për Media kanë sqaruar për Gazetën se SHSKUK i ka dërguar vetëm emrat, ndërkaq për udhëtimin e tyre është çështje e MSH-së dhe Qeverisë.
Kurse ministri i Shëndetësisë Arben Vitia në një postim të tij ka deklaruar se tashmë ekipet e para mjekësore nga Kosova gjenden në zonat e prekura nga tërmeti në Turqi.
“Dhimbje dhe trishtim nga tragjedia që ka goditur Turqinë dhe Sirinë duke shkaktuar mijëra jetë të humbura. Tashmë ekipet e para mjekësore nga Kosova kanë arritur në zonat e prekura nga tërmeti për të ofruar ndihmën tonë, paralelisht siç e ndajmë edhe dhembjen për popullin mik të Turqisë. Bashkëndjejmë me të gjithë familjarët e prekur nga kjo tragjedi”, thuhet në postimin e Vitisë.
Kujtojmë se një ekip i specialistëve të kërkim-shpëtimit si dhe mjekë të FSK-së janë dërguar në Turqi gjatë ditës së djeshme.
“Kontingjenti i Gardës Kombëtare të Forcës së Sigurisë së Kosovës përbëhet nga specialistë të kërkim-shpëtimit urban, ekipe mjekësore dhe ekipe të kërkim shpëtimit K9, që janë nisur sot në orët e mbrëmjes drejt Republikës së Turqisë, për t’u bashkuar qindra ekipeve të shpëtimit nga Turqia e vende partnere në misionin e shenjët për të ndihmuar popullin e Turqisë që u prek rëndë nga tërmeti i orëve të para të ditës së sotme”, thuhet në njoftimin e FSK-së.
Tërmeti 7.4 shkallësh në Turqi i cili ndodhi mëngjesin e së hënës ka lënë mijëra të vdekur dhe të plagosur. Deri më tani janë regjistruar të paktën mbi 6 mijë viktima. /Gazeta Shneta/