Republika e Kosovës vazhdon të mbetet pa institucione funksionale, pasi Kuvendi nuk ka arritur të konstituohet as pas më shumë se tre muaj përpjekjesh.
Seanca konstituive e hapur më 15 prill, me gjithë betimin e deputetëve më 19 prill, nuk ka prodhuar asnjë rezultat konkret. Përkundrazi, janë bërë plot 54 përpjekje pa sukses për të zgjedhur kryetarin e Kuvendit.
Pas përfundimit të afatit 30-ditor të dhënë nga Gjykata Kushtetuese, dhe dështimeve të njëpasnjëshme për ta mbyllur seancën, më 8 gusht pritet një vendim kyç, i cili mund të çojë deri te shpërndarja e legjislaturës së nëntë.
Nga e diela, Kushtetuesja ka pezulluar çdo veprim të Kuvendit, derisa të shqyrtohen tri lëndë që kanë të bëjnë me procesin e konstituimit. Kërkesat janë dorëzuar nga PDK, LDK dhe më pas edhe nga Presidentja Vjosa Osmani.
Për gati 100 ditë, deputetët kanë realizuar vetëm 4 orë e gjysmë punë në total, ndërsa pjesëmarrja e tyre në seanca është bërë çdo dy ditë – për të qëndruar aty jo më shumë se 5 minuta.
Përplasjet politike kanë qenë të ashpra, me VV-në që insistoi për votim të fshehtë, ndërsa PDK, LDK dhe AAK e kundërshtuan me forcë këtë formë, duke kërkuar që Vetëvendosje të propozojë një kandidat tjetër për kryetar Kuvendi, pasi Albulena Haxhiu nuk arriti të sigurojë shumicën prej 61 votash në asnjërën nga përpjekjet.
Përballë këtij bllokimi institucional, Kushtetuesja tani ka në dorë çështjen më të rëndësishme politike të këtij viti: nëse do ta shpërndajë Kuvendin dhe ta çojë vendin drejt zgjedhjeve të reja, apo do të vendosë për ndonjë zgjidhje tjetër kushtetuese.