Prokuroria në Gjakovë ka ngritur aktakuzë ndaj të pandehurit D.Ll. për ngacmim seksual, sipas Kodit Penal të Kosovës.
Prokuroria Themelore në Gjakovë, Departamenti i Përgjithshëm, ka bërë të ditur se ka ngritur aktakuzë kundër të pandehurit me inicialet D.Ll., për veprën penale “Ngacmimi Seksual”, sipas nenit 183 paragrafi 4, lidhur me paragrafin 1, të Kodit Penal të Republikës së Kosovës.
Sipas aktakuzës, ngjarja ka ndodhur më 26 mars 2025, në Shkollën e Mesme të Ulët “M.K.” në Gjakovë, ku i pandehuri dyshohet se ka ngacmuar seksualisht një të mitur, e cila konsiderohet viktimë e ndjeshme për shkak të moshës.
Sipas Prokurorisë, i pandehuri është përfshirë në sjellje të padëshiruara verbale me përmbajtje seksuale, të cilat kanë cenuar dinjitetin e të dëmtuarës dhe kanë krijuar një mjedis frikësues, degradues dhe poshtërues për të.
Prokurori i çështjes ka propozuar që i pandehuri të shpallet fajtor dhe të dënohet sipas ligjit për veprën penale që i vihet në barrë, si dhe të vazhdohet masa e paraburgimit deri në marrjen e aktgjykimit të plotfuqishëm.