Njerëzit janë aq të dëshpëruar për ushqim në Gaza saqë po bluajnë ushqimin e kafshëve për ta përdorur si miell, thotë një organizatë bamirëse britanike, duke paralajmëruar se “uria po kanoset në të gjithë territorin”.
Në një deklaratë të publikuar në faqen e saj të internetit, Actionaid tha se uria po arrinte “nivele katastrofike” në Gaza, raporton The Guardian, transmeton Gazeta Express.
“Çdonjëri nga 2.3 milionë banorët e Gazës që tani përballet me krizë ose me nivelet më të këqija të urisë, disa janë aq të dëshpëruar për ushqim saqë po bluajnë ushqimin e kafshëve për ta përdorur si miell”.
Asnjë nga 335,000 fëmijët e Gazës nën moshën pesë vjeç nuk po ushqehet mjaftueshëm, sipas Programit Botëror të Ushqimit, gjë që rrezikon të pengojë rritjen e tyre dhe të shkaktojë komplikime shëndetësore gjatë gjithë jetës.
“Ndërkohë disa nëna të reja janë aq të kequshqyera sa nuk janë në gjendje të prodhojnë qumësht për fëmijët e tyre”.
Një nënë e gjashtë fëmijëve e cila lindi djalin e saj pasi u zhvendos nga shtëpia e saj në Gazën veriore tha për Actionaid se për shkak të vështirësisë në dhënien e gjirit dhe rritjes së çmimit të qumështit, ajo nuk ishte në gjendje të ushqente djalin e saj që kishte të vjella. Ajo tha se një kanaçe me qumësht tani kushton 70 ose 80 shekels (17.44 apo 19.94 Euro).
Sipas organizatës bamirëse, vetëm 15 nga 97 furrat e bukës së Gazës janë tani funksionale dhe të gjitha këto janë në jug: nuk ka furra buke që funksionojnë në veri. Ajo gjithashtu theksoi mungesën e ujit; Një person në Gaza tani ka mesatarisht vetëm 1,5 deri në 2 litra ujë çdo ditë për të gjitha nevojat e tij duke përfshirë pirjen, larjen dhe pastrimin.