Drejtori i Qendrës Klinike Stomatologjike Universitare Dr. Kastriot Meqa ka folur për gjendjen e klinikave të mbingarkuara me specializantë nga konkursi i vitit 2020.
Meqa ka thënë se numri i specializantëve është shumëfishuar nga ky konkurs dhe kjo e pengon punën cilësore. Ai ka thënë se janë përpjekur që t’i shpërndajnë specializantët edhe në qendra tjera për të ulur numrin e tyre në QKSUK, shkruan Gazeta Shneta.
“Numri i specializantëve është rritur shumëfish dhe mbingarkesa e pengon punën cilësore sepse ata e ndjekin një planprogram shumë specifik. Poashtu mentorët janë të mbingarkuar dhe sipas udhëzimit adminsitrativ më së shumti mund të mbikëqyr tre specializantë ndërsa ne kemi mentor me 12 specializantë”.
“Kjo ka qenë një sfidë shumë e madhe për institucionin tonë dhe komitetin specialistik dhe për Bordin. Ne kemi arritur që të zvogëlojmë ngërkesën pak a shumë duke i dërguar nëpër qendra tjera ku kanë pasur mundësi të gjejnë mentor ose bashkëmentor dhe për këtë i falënderoj kolegët që i kanë pranuar”, ka deklaruar Meqa.
Ai ka thënë se për shkak të kësaj gjendje nuk presin cilësi në shkollimin specialistik.
“Shpresojmë që të mos përsëritet kjo gjendje. Koha kalon mirëpo ajo që është më e rëndësishme është aftësimi i tyre dhe formimi si specialist dhe në sasinë që këta specializantë janë pranuar ne faktikisht nuk presim ndonjë cilësi në shkollimin specialistik dhe do të reflektohet në të ardhmen në disa lëmi specialistike”.
“Lëmitë më të ngarkuara janë kirurgjia orale dhe ortodoncia sepse nuk kanë mentor të mjaftushëm. Të mbingarkuara janë edhe paradontologjia dhe mjekësia orale”, ka deklaruar Meqa. /Gazeta Shneta/