Organizatat më të mëdha humanitare në botë kanë ngritur alarmin për rritjen e sulmeve ndaj shërbimeve shëndetësore në zonat e konfliktit, duke e cilësuar situatën si një dështim të vullnetit politik për të mbrojtur jetën e pacientëve dhe stafit mjekësor.
Në një letër të përbashkët, drejtues të Komitetit Ndërkombëtar të Kryqit të Kuq, Organizatës Botërore të Shëndetësisë dhe Mjekëve pa Kufij u kanë bërë thirrje liderëve botërorë të ndërmarrin veprime urgjente për t’i dhënë fund dhunës ndaj kujdesit shëndetësor në zonat e luftës, shkruan Euronews transmeton Gazeta Shneta.
“Kujdesi shëndetësor nuk duhet të jetë kurrë viktimë e luftës”, thuhet në deklaratë.
Megjithëse Këshilli i Sigurimit i Kombeve të Bashkuara kishte miratuar njëzëri “rezolutën 2286 për mbrojtjen e shërbimeve shëndetësore në konflikte të armatosura”, organizatat theksojnë se situata sot është edhe më e rëndë se një dekadë më parë.
“Të shënojmë këtë moment nuk është një arritje – është një dështim”, thuhet më tej në reagim.
Sipas tyre, sulmet ndaj spitaleve, ambulancave dhe personelit mjekësor po vazhdojnë çdo ditë, duke treguar se normat ndërkombëtare për mbrojtjen e civilëve në luftë po dështojnë në praktikë.
Të dhënat e OBSh-së tregojnë se vetëm gjatë vitit 2025 janë regjistruar 1,348 sulme ndaj objekteve shëndetësore, me 1,981 viktima.
Sudani rezulton vendi më i goditur, me 1,620 viktima, i ndjekur nga Mianmari, Palestina, Siria dhe Ukraina. Ndërkohë, vetëm në muajt e parë të vitit 2026 janë raportuar 521 sulme në 13 vende, me 408 viktima.
Organizatat humanitare kanë përmendur edhe një sërë rastesh të rënda gjatë viteve të fundit, përfshirë bombardime të spitaleve në Siri dhe Jemen, sulme me dronë në Mianmar, si dhe goditje ndaj ambulancave në vende si Kameruni, Haiti dhe Libani.
Në Ukrainë, sipas të dhënave, sulmet ndaj kujdesit shëndetësor janë rritur me rreth 20% krahasuar me vitin 2024.
Që nga fillimi i pushtimit të plotë rus në vitin 2022, janë dokumentuar të paktën 2,881 sulme ndaj infrastrukturës dhe personelit shëndetësor.
“Kur kujdesi shëndetësor nuk është më i sigurt, kjo është shenja më e qartë se rregullat e luftës po shpërbëhen”, paralajmërojnë organizatat. /Gazeta Shneta/