Pacientët në Komunën e Podujevës tash e gjashtë vite fotografimin e nofullës janë të detyruar të bëjnë në ordinanca private, pasi që një i tillë nuk bëhet në Qendrën Kryesore të Mjekësisë Familjare në këtë komunë.
Kujdesi Parësor Shëndetësorë në këtë qytet është i pajisuar me aparaturën për fotografim të nofullës – Ortopanë, por si pasojë e mungesës së kodit të licencës tash e gjashtë vite nuk kanë arritur të funksionalizojnë, madje për këtë ka reaguar kryeshefi i QKMF-së, Bajram Bajgora.
“Derisa pacientët bredhin dhe shpenzojnë privat për një fotografim nofulle, aparati i ri qëndron tash e 6 vite në hapsirat tona dhe nuk mund të futet në punë në mungesë kodi të licencës”, ka shkruar ai në Facebook.
Sipas tij, përpjekjet për të funksionalizuar këtë aparaturë, të nevojshme për pacientët, kanë qenë të kota.
“Diçka po fshihet këtu, shtrohet pyetja jemi simbiozë me grupet e interesit apo të pafuqishëm përballë tyre,apo mund të jetë opcioni i blerjes së një të riu për të mbuluar me “pluhër” këtë që e kemi”, është shprehur tutje. /Gazeta Shneta/