Organi Shqyrtues i Prokurimit ka pezulluar tenderin e Ministrisë së Shëndetësisë për furnizim me aparatura dhe teste serologjike.
Të hënën e kësaj jave, Organi Shqyrtues i Prokurimit ka vazhduar pezullimin e tenderit për ‘furnizim emergjent me aparaturë dhe pajisje laboratorike për testime serologjike për COVID-19’, të cilin e inicioi Ministria e Shëndetësisë në fund të muajit korrik.
Paraprakisht, ky tender ishte pezulluar me vendim të OShP-së më 30 korrik – një ditë pas pranimit të ofertave.
“Mbetet në fuqi obligimi i pezullimit automatik, lidhur me aktivitetin e prokurimit ‘Furnizim emergjent me aparaturë dhe pajisje laboratorike për testim molekular dhe aerologjik për COVID-19’. OShP do të vazhdojë me shqyrtimin e ankesës së operatorit ekonomik ankues në procedurë të rregullt”, theksohet në vendimin e OShP-së, më datë 24 gusht, shkruan insajderi.
Përmes kësaj kontrate publike, Ministria synonte të furnizohej me 20 mijë teste serologjike, si dhe pajisje laboratorike që mundësojnë kryerjen e testimeve në spitalet e përgjithshme rajonale.
Por, kriteret e përcaktuara në dosjen e këtij tenderi nga Zyra e Prokurimit të Ministrisë së Shëndetësisë, ngritën dyshime mbi koston e lartë të kontratës dhe mundësinë e shpërdorimit të parasë publike.
Kryetari i OShP-së, Blerim Dina kundërshtoi fuqishëm kërkesën e Ministrisë për “heqje të obligimit të pezullimit automatik” të hënën.
Dina, siç thuhet në arsyetimin e vendimit të OShP-së, ka pohuar se tenderi emergjent i MSh-së mund të ketë pasoja të mëdha.
“Mund ta dëmtojë buxhetin e shtetit”, citohet të ketë thënë kreu i OShP-së.
Ndërkaq, Ministria e Shëndetësisë ka thënë se pezullimi i tenderit “nuk i ndalon qendrat e mjekësisë familjare që të kryejnë teste serologjike nëpër komunat përkatëse”.
Por, që prej fillimit të pandemisë COVID-19, teste serologjike në sektorin publik kanë kryer vetëm Qendrat e Mjekësisë Familjare në Prishtinë.
“Testime me PCR kryen IKSHPK dhe një institucion privat, ndërsa testime serologjike mund të kryejnë të gjitha laboratoret biokimike -hematologjike në sektorin publik”, ka thënë Ministria e Shëndetësisë në një përgjigje me shkrim për Gazetën Insajderi të martën.
Ministria i ka thënë gazetës se tenderi i pezulluar nga OShP-ja ishte paraparë të adresonte çështjen e testimeve serologjike në spitalet e përgjithshme rajonale.
“Këto lote kanë pasur të bëjnë edhe me pajisje edhe me teste serologjike të dedikuara për qendrat rajonale të shëndetësise publike. Për lot 2 -Aparaturë dhe teste serologjike, pas hapjes se tenderit është ankuar një OE ne OSHP dhe Lot 2 është pezulluar”, ka thënë Zyra për Informim e MSh-së.
Ministria ka thënë se aktualisht është e detyruar të pres shqyrtimin në afate të rregullta nga OSHP-ja deri në një vendim te ardhshëm.
Artikullin e plotë mund ta lexoni në insajderi.org