Pacientë të shumtë shkojnë në spitalet kosovare për t’u shëruar, por në fakt ata kthehen me shumë infeksione, siç shkruan Gazeta Zëri.
Madje, këtë e konfirmon edhe vetë Instituti Kombëtar i Shëndetit Publik, mikrobiologu Lul Raka tregon për zërin se dy të tretat e pacientëve kosovarë marrin infeksione.
Derisa më të rrezikuarit janë Kujdesi Intensiv dhe ai i Kirurgjisë.
“Infeksionet janë pjesë e pandashme e kujdesit shëndetësor në të gjitha shtetet e botës. Në kujdesin intensiv të shteteve më të zhvilluara në botë çdo i katërti pacient merr infeksion spitalor, kurse në vendet e pazhvilluara, ku bën pjesë edhe Kosova, dy të tretat e pacientëve marrin infeksione spitalore. Kujdesi intensiv edhe repartet e kirurgjisë janë pjesët më të rrezikshme”, ka deklaruar ai.
Raka ka treguar se Kosova nuk ka asnjë nënkategori buxhetore për infeksione të tilla.
“Kosova nuk mban asnjë kategori nënbuxhetore për parandalimin e infeksioneve spitalore. Pa buxhet është më vështirë. Problemet më të mëdha janë në spitale, sepse është kujdesi i nivelit më të lartë. Duhet të ketë mbështetje institucionale dhe mbikëqyrje të rregullt në reparte të ndryshme, të cilat janë më të shpeshta për adresim. Duhet të ketë bashkëpunim rajonal e ndërkombëtar”, ka thënë ai.