Në ditët e fundjavës vendi ynë mbetet ende nën ndikimin e fushave anticiklonike, që gradualisht po humbasin fuqinë dhe masave të ngrohta ajrore mesdhetare, por nga dita e diel një turbullirë nga Atlantiku, që do t’i afrohet rajonit do të sjell në mbrëmje reshje të dobëta shiu, e me kalimin e saj mbi rajon, nga dita e hënë priten edhe reshje bore.
Të shtunën do të mbajë mot i butë, pjesërisht i vranët, e të dielen vransirat do të shtohen, ku në mbrëmje priten edhe reshje lokale shiu, që më vonë me kalimin e frontit të ftohtë, do të përzien edhe me reshje bore.
Sikurse ditëve të fundit, edhe në fundjavë, në orët e mëngjesit në vise të ulëta do të ketë mjegull.
Nga dita e hënë do të mbajë mot i ftohtë, me erë dhe kohëpaskohe me reshje bore, të cilat me intenzitet më të dobët do të vazhdojnë edhe ditën e martë, kur edhe pritet të pushojnë. Të mërkurën parashihet të mbajë mot pjesërisht i vranët dhe me intervale më të gjata me diell.
Edhe në fundjavë temperaturat maksimale do të mbeten mbi vlera mesatare duke u sillur nga 10C deri në 11C, e ato minimale -1C deri 1C, e nga dita e hënë, temperaturat do të pësojnë rënie të theksuar në të dy vlerat, maksimalet deri në 2C, e ato minimale edhe deri në -4C.
Era do të fryejë lehtë dhe mesatare nga juglindja 3-7m/s, e nga dita e hënë mesatarisht e fuqishme nga veriperëndimi 5-12m/s.
Shtypja atmosferike do të zbres rreth vlerave normale.