Ministria e Shëndetësisë ka marr vendim për anulimin e specializimit të nëntë mjekëve pas aktgjykimit të Gjykatës së Apelit ku shfuqizohet vendimi i ish-ministrit Ferid Agani për baras-vlerësimin e përvojës së punës.
Bordi Qendror për Regjistrim dhe Licencim të Profesionistëve Shëndetësor ka shfuqizuar titujt akademik të nëntë mjekëve, të cilët përfshihen në vendimin 145/12 të ish-ministrit Ferid Agani.
Shfuqizimi i titujve të këtyre mjekëve, vjen pas anulimit të vendimit të Aganit nga Gjykata e Apelit.
Kreu i Bordit, Hysni Bajrami, thotë se vendimi 145/12 përfshin vetëm nëntë mjekë të cilëve iu është baras-vlerësuar përvoja e punës.
“Aktgjykimi i Gjykatës së Apelit ka atakuar vetëm nëntë vendime për baras-vlerësim, të cilët përfshihen në vendimin e ish-ministrit Agani”, deklaron Bajrami.
Ai thotë se ekziston edhe një vendim i mëhershëm, i cili nuk atakohet në aktgjykimin e Apelit dhe i cili përfshin 50 mjekë të tjerë.
Bajrami deklaron se pas shfuqizimit të titujve akademik të këtyre nëntë mjekëve, tani janë në proces të gjetjes së një zgjidhje për ta.
Ish-ministri i Shëndetësisë, Ferid Agani, në vitin 2012 kishte nxjerrë një vendim për baras-vlerësimin e përvojës profesionale më shumë se 5 vjeçare me titull akademik Doktor Shkence dhe me shumë se 7 vjet përvojë me titull akademik Magjistër i Shkencave.
Ndaj këtij vendimi ishin ankuar një grup mjekësh të cilët edhe kishin ushtruar padi në Gjykatën Themelore në Prishtinë. Skender Telaku, Gani Bajraktari, Daut Gorani, Agim Krasniqi, Nehat Rexhepi dhe Nebi Musliu, konsideronin se vendimi ishte tendencioz dhe kishte për qëllim favorizimin e disa personave për të marr pozita udhëheqëse në klinikat e QKUK-së.
Poashtu, sipas arsyetimit të tyre në padi, theksohet se ministri nuk mund t’iu jepte titull profesional një profesionisti i cili nuk ka kryer stazh specialistik, nuk ka mbajtur asnjë ligjëratë dhe nuk i është nënshtruar provimit specialistik.
“Anulohet vendimi i të paditurës Ministria e Shëndetësisë, Zyra e Ministrit, Nr. 145/12 i datës 18.09.2012 dhe çështja i kthehet të paditurës në rishqyrtim dhe rivendosje”, thuhet në aktgjykimin e Gjykatës Themelore.
Gjykata ka arsyetuar anulimin e këtij vendimi pasi janë gjetur shkelje të Ligjit për Konflikte Administrative dhe e ka konsideruar si të kundërligjshëm.
Ministria e Shëndetësisë kishte apeluar vendimin, por Gjykata e Apelit ka hedhur poshtë ankesën.
“Qëndrimin juridik të gjykatës së shkallës së parë si të rregullt dhe të bazuar në ligj në tërësi e aprovon edhe kjo gjykatë”, thuhet ndër të tjera në aktvendimin e Apelit i shpallur më datën 18 korrik të këtij viti. /Gazeta Shneta/