Inspektorati Shëndetësor i Ministrisë së Shëndetësisë, gjatë periudhës janar – gusht 2023, ka realizuar 678 inspektime nga të cilat 364 inspektime kanë qenë të planifikuara, 134 inspektime specifike si dhe 180 tematike.
Gjatë kësaj periudhe janë shqiptuar 72 vendime të shkallës së I-rë , me gjobë. Nga këto raste, 33 vendime janë të shqiptuara për institucionet të cilat punojnë pa licencë, si dhe 39 vendime të tjera ku u konstatuan shkelje dhe parregullsi të ndryshme, shkruan Gazeta Shneta.
Ministria e Shëndetësisë thotë se mbetet e përkushtuar në zbatimin e Ligjit dhe dispozitave të tjera në funksion të rritjes së cilësisë dhe sigurisë së shërbimeve mjekësore dhe kujdesit ndaj qytetarëve në Institucionet Shëndetësore. Sipas tyre, ndaj shkelësve të ligjit nuk do të ketë asnjë tolerancë. Subjektet të cilat ofrojnë shërbime shëndetësore duhet të respektojnë të gjitha rregullat e parapara me ligj për ushtrim të veprimtarisë.
Me qëllim të mbrojtjes së shëndetit publik, ofrimit të shërbimeve shëndetësore cilësore dhe zbatimit të ligjit, ata kanë ftuar qytetarët që të bashkëpunojnë dhe të sinjalizojnë kur hasin në veprimtari të dyshimta të institucioneve shëndetësore duke telefonuar në numrat: Inspektorati Shëndetësor: 03820024154 apo Linja e ankesave: 080017777.
