Rreth 100 punëtorë shëndetësorë kryesishtë infermierë të angazhuar me një marrëveshje në mes të Komunës së Vitisë dhe ‘Caritas Kosova’, kanë mbetur pa punë meqë kontrata e punës së tyre ka përfunduar më 28 shkurt të këtij viti.
Largimi nga puna i këtyre infermierëve cilët kanë shërbyer në Qendrën Kryesore të Mjekësisë Familjare në Viti, në Qendrën e Mjekësisë Familjare në Pozheran dhe në ambulantat e disa fshatrave, ka shkaktuar mjaftë telashe ngaqë pa këtë staf është i vështirë funksionimi dhe ofrimi i shërbimeve mjekësore për të gjithë pacientët.
Burime brenda komunës konfirmojnë se kontrata që kishin me Caritas Kosova, ka skaduar më 28 shkurt dhe thanë se janë duke ndjekur procedurat përkatëse për një kontratë të re në javët në vazhdim ngase e konsiderojnë shumë të rëndësishëm një projekt të tillë për sektorin e shëndetësisë.
Në Viti qe disa vjet, përmes projektit me ‘Caritas Kosova’ kanë qenë të punësuar rreth 120 punëtorë shëndetësorë, dhe me përfundimin e kontratës së punës, shumë prejt tyre kanë mbetur pa punë, ndërsa thuhet se disa të tjerë po vazhdojnë në bazë të gatishmërisë së tyre deri në nënshkrimin e kontratës së re.
Plus Tv nuk ka arritur që gjatë të hënës të marrë ndonjë deklaratë zyrtare nga ana e komunës lidhur me këtë kontratë të shërbimeve shëndetësore dhe sa i kushton për çdo vit buxhetit të komunës kontraktimi i punëtorëve shëndetësorë, sipas marrëveshjes ndërmjet “Caritas Kosova” dhe Komunës së Vitisë.
Përfundimi i kësaj kontrate ka ngjallur shumë pakënaqësi në mesin e punëtorëve shëndetësorë që janë të angazhuar në projektin e “Caritasit” dhe presin nga institucionet një zgjidhje për punësimin e tyre në fushën e shëndetësisë.