Gjatë ditës së djeshme në Klinikën Infektive në QKUK është përuruar laboratori mikrobiologjik, investim ky nga qeveria e Italisë. Përurimi i bë nga ministri i Shëndetësisë Dr. Arben Vitia dhe ambasadori italian Nicola Orlando.
Gjatë konferencës Vitia ndër të tjera u pyet nëse do të marr pjesë në të gjitha përurimet, sikurse bënte paraardhësi i tij nga radhët e PDK-së Uran Ismaili. Ministri nga VV tha se e ka obligim të vijë në QKUK, por nuk do t’ua marr meritat punëtorëve shëndetësorë, shkruan Gazeta Shneta.
“Sot është hera e parë që jam në një ceremoni të tillë. Kam qenë disa herë në SHSKUK ku kam pasur takime pune me zyrtarët. Nuk besoj që takimet e punës duhet të marrin vëmendjen e publikut që të informohen mediat. Mirëpo takimet e punës natyrisht se do të jenë të përjavshme apo të përditshme. Në fund të fundit ambasadori italian e tha një fjalë domethënëse ‘ne po i mbledhim frutat këtu’ duke më përfshirë edhe mua. Mirëpo kjo nuk ishte një meritë e imja, por e punëtorëve shëndetësorë dhe miqve italian të cilët na kanë ndihmuar për realizimin e këtij projekti dhe kështu do të vazhdojmë më tutje”, ka deklaruar Vitia.
Ish-ministri Ismaili së bashku me shefin e tij të PDK-së Kadri Veseli, merrnin pjesë shpesh në përurime të renovimeve në QKUK, edhe nëse punimet nuk kishin përfunduar plotësisht. /Gazeta Shneta/