Largimi i mjekëve nga Kosova është një fenomen shqetësues duke marrë parasysh faktin që numër i madh i klinikave kanë mbetur pa staf.
Vetëm vitin e fundit janë larguar pesë specializantë për në Gjermani, ka konfirmuar drejtori i Klinikës së Pulmologjisë, Musa Hoxha.
“Vetëm vitin e fundit 5 specializantë që kanë shkuar në Gjermani. Normalisht që kemi nevojë për specialistë pulmolog. Gjatë kësaj kohe shumë më tepër jemi përballur edhe me mungesë të stafit të mesëm infermier sepse ka qenë numër i kufizuar. Gjithmonë kemi pasur mungesë të infermierëve”, tha Hoxha për ekonomiaonline.
Ai më tej ka shtuar se Kosova tashmë është në valën e gjashtë të pandemisë, duke theksuar se kanë nevojë për staf shtesë sepse ka mungesë të infermierëve.
Ndërsa, kryetari i Shoqatës për Mbrojtjen e të Drejtave të Pacientëve, Besim Kodra tha se është një trend i madh i ikjes së profesionistëve shëndetësor.
Tutje, ai shtoi se shëndetësia duhet të jetë prioritet i Qeverisë së Kosovës, raporton EO.
“Është një trend bajagi i madh por që qeveria nuk e ka vëmendjen e duhur në shëndetësi. Nuk mjafton vetëm rritja e pagave mirëpo shëndetësia duhet të jetë prioritet në mënyrë që ata të kenë kushte të punës dhe paga të dinjitetshme dhe të mos kenë nevojë të largohen nga vendi”, tha Kodra.