Qendra Klinike Universitare e Kosovës ka bërë të ditur se më datë 27 gusht 2025, në Klinikën Emergjente të QKUK-së është pranuar një fëmijë pesëvjeçar nga fshati Brod i komunës së Shtërpcës, me lëndime në gjoks dhe shpinë.
Sipas deklarimeve të familjarëve, fëmija është sulmuar nga një ujk dhe është tërhequr zvarrë disa metra nga oborri i shtëpisë, thuhet në njoftimin zyrtar nga Shërbimi Spitalor Klinik dhe Universitar të Kosovës (ShSKUK).
Ndërkohë, pas pranimit në Klinikën Emergjente, ai ka marrë trajtimin e parë mjekësor dhe i janë kryer ekzaminimet fillestare të nevojshme. Aktualisht, pacienti është pranuar në Klinikën e Kirurgjisë Torakale, ku gjendja e tij vlerësohet stabile, transmeton Gazeta Shneta.
Në përputhje me protokollet mjekësore, fëmijës i janë dhënë vaksinat e nevojshme dhe është përfshirë në kujdes edhe një psikolog klinik, për vlerësimin dhe mbështetjen e gjendjes emocionale, thuhet në njoftim.
Pavarësisht se gjendja shëndetësore e pacientit është stabile, mjekët kanë bërë të ditur se ai do të qëndrojë disa ditë në klinikë për monitorim të vazhdueshëm dhe për të reaguar në rast të ndonjë ndryshimi të mundshëm. /Gazeta Shneta/