Komisioni Evropian gjatë ditës së djeshme me 22 prill autorizoi një antibiotik të ri të zhvilluar për të kundërshtuar rezistencën antibakteriale, një nga kërcënimet më të mëdha shëndetësore me të cilat po përballet aktualisht BE.
Emblaveo, i zhvilluar nga Pfizer dhe i miratuar sot nga Komisioni Evropian, mund të përdoret për të trajtuar infeksionet e komplikuara intra-abdominale dhe të traktit urinar, pneumoninë e fituar nga spitali dhe infeksionet e shkaktuara nga disa lloje të baktereve rezistente ndaj barnave, raporton Euronews Health përcjell Gazeta Shneta.
“Ky ilaç i miratuar rishtazi do të mbushë një boshllëk të rëndësishëm ku aktualisht ka një numër shumë të kufizuar opsionesh trajtimi,” tha ekzekutivi i BE-së në një deklaratë për shtyp.
Ky autorizim vjen një muaj pasi Agjencia Evropiane e Barnave miratoi një opinion pozitiv dhe rekomandoi autorizimin e saj të marketingut.
Antibiotiku u vlerësua sipas mekanizmit të vlerësimit të përshpejtuar të EMA për shkak të “përfitimeve të mëdha të shëndetit publik”.
Ndër indikacionet e Emblaveo, përfshihet për të trajtuar infeksionet e baktereve gram-negative, të cilat aktualisht janë rezistente ndaj shumë antibiotikëve të disponueshëm.
Rezistenca antimikrobike shpesh quhet “pandemi e heshtur” dhe Organizata Botërore e Shëndetësisë (OBSH) ka vlerësuar se ajo shoqërohet me rreth 4.9 milionë vdekje në vit. Vetëm në BE, rezistenca antimikrobike është përgjegjëse për 35,000 vdekje çdo vit.
Vitet e fundit, keqpërdorimi dhe përdorimi i tepërt i antibiotikëve kanë bërë që disa mikroorganizma – të njohur si ‘super mikrobe’ – të zhvillojnë rezistencë antimikrobike dhe të mos reagojnë më ndaj antimikrobikëve. Kjo bën që ilaçet të jenë më pak efektive dhe infeksionet të vazhdojnë, ndonjëherë duke u bërë të patrajtueshme dhe duke rritur rrezikun e përhapjes. /Gazeta Shneta/