Kirurgët dhe anesteziologët e QKUK-së janë të detyruar të punojnë në sallat operative dhe intensivë edhe në temperaturat mbi 30 gradë celsius. Kjo jo vetëm vështirëson punën e mjekëve, por edhe rrezikon pacientët nga infeksionet.
Janë bërë disa javë që kur sistemi qendror i klimatizimit të sallave operative dhe Mjekimit Intensiv Qendror në QKUK është prishur. Menaxhmenti ende nuk e ka rregulluar, ndërsa ka bërë një zgjidhje e cila më shumë rrezikon pacientët sesa siguron kushte optimale, shkruan Gazeta Shneta.
QKUK në vend të klimatizimit i cili përveç mbajtjes së temperaturës optimale të ajrit mundëson edhe filtrimin, ka vendosur klima të thjeshta të cilat bëjnë ftohjen e ajrit. Këto klima fusin ajër të ftohtë brenda, por nuk mundësojnë kontrollimin e mikroorganizmave në ajër të cilët rrezikojnë pacientët me infeksione.
Një nga instrumentaret e Klinikës së Kirurgjisë Abdominale ka treguar për Gazetën se kjo nuk është hera e parë që klimatizimi nuk funksionon. Ajo ka treguar se menaxhmenti ka bërë një zgjidhje me klima të thjeshta, por klimatizimi qendror ende nuk është rregulluar.
E menaxhmenti i QKUK-së nuk e din as vet se kur do të rregullohet. Zyra për Informim ka deklaruar se është identifikuar problemi, por nuk kanë treguar nëse do të sanohet. “Zyra për informim ju njofton se, sa i përket sallave opererative në bllokun kirurgjik, jemi në fazën e vlerësimit të dëmit, është identifikuar se bëhet fjalë për prishje-dëmtim të çilerave, problem ky që ka qenë për vite të tëra”, thuhet në përgjigjen e QKUK-së.
Zyrtarët nuk kanë dhënë sqarime tjera në pyetjet e Gazetës nëse kanë marr parasyshë rrezikimin e pacientëve nga infeksionet për shkak të mungesës së filtrimit të ajrit. /Gazeta Shneta/