Dy krerë të Partisë Demokratike të Kosovës kanë prerë shiritat e ndërtesës së re të Ambulancave Specialistike dhe Administratës së QKUK-së. Ky projekt kishte nisur në vitin 2013 kur Ministrinë e Shëndetësisë e drejtonte Dr. Ferid Agani
Në janar të vitit 2013 ish-ministri Ferid Agani kishte bërë të ditur se do të niste projekti për ndërtimin e hapësirave të reja për Ambulancat Specialistike në QKUK. Zyrtarët e kësaj të fundit patën deklaruar se do të ndahen 1 milion euro për ndërtimin e ndërtesës së re të ambulancave specialistike.
Ndërtimi i kësaj ndërtese kishte vazhduar edhe në kohën e ministrit pasardhës Imet Rrahmani nga LDK, ndërsa ‘shiritin e ka prerë’ ministri aktual Uran Ismaili së bashku me shefin e partisë së tij Kadri Veseli nga PDK, shkruan Gazeta Shneta.
Këtë ndërtesë të nisur në vitin 2013, Veseli e mori shembull të punës së madhe që sipas tij po bëhet në shëndetësi nga ministri Ismaili.
“Ndryshimet rrënjësore që po ndodhin në shëndetësinë kosovare janë më se të dukshme. Për shumë vjet, qytetarët kanë marrë shërbime specialistike nëpër bodrume të QKUK-së, në kushte aspak të dinjitetshme dhe me pritje të gjata. Të gjitha këto kanë marrë fund”, ka thënë Veseli.
Ndërsa Ismaili tha se sot është një ditë e mirë për shëndetësinë kosovare, e cila ngadalë po lë mbrapa të kaluarën e hidhur për t’i hapur rrugë transformimit dhe modernizimit të shërbimeve mjekësore për qytetarët e Kosovës.
“Të gjithë i kemi ende të freskëta pamjet e rënda nga bodrumet e QKUK-së ku qytetarët tanë merrnin shërbime shëndetësore në ambulancat specialistike. Ai vend nuk ka qenë i denjë për trajtimin e pacientëve. Sot, jam jashtëzakonisht i lumtur që pas një pune shumë të madhe, e përuruam objektin e ri të ambulancave specialistike për të lënë mbrapa të kaluarën e hidhur. Një objekt modern prej 2500 metrash katrorë, i pajisur me aparaturën më moderne, tashmë është i gatshëm për ofrimin e shërbimeve shëndetësore dinjitoze për deri në 900 pacientë në ditë”, u shpreh Ismaili.
Drejtori i SHSKUK-së, Basri Sejdiu tha se tani me kushtet e reja dhe kapacitetin e ambulancave të reja specialistike, qytetarët e Kosovës do të mundë të marrin shërbime dinjitoze.
Në objektin e ri tani janë transferuar ambulancat specialistike: Ortopedia, Fiziatria, Reumatologjia, Endokrinologjia, Kardiologjia, Kardiokirurgjia, Urologjia, Neurokirurgjia, Kirurgjia e Fëmijëve, Kirurgjia Vaskulare, Kirurgjia Torakale, Kirurgjia Abdominale, Kirurgjia Plastike etj. /Gazeta Shneta/