Dhjetëra specialistë të stomatologjisë gjatë ditës së sotme kanë protestuar për një orë para ndërtesës së Qeverisë së Kosovës.
Nga ora 10 deri në 11 të para ditës, stomatologët kanë kërkuar nga Qeveria realizimin e një premtimi që ua kishte dhënë ministri i Shëndetësisë Uran Ismaili, qysh në vitin 2017, shkruan Gazeta Shneta.
Valon Halili, një nga protestuesit, ka thënë se kërkesa e tyre është realizimi i këtij premtimi, ndërsa nuk duan që protesta e tyre të politizohet.
“Kërkesa jonë është punësimi, distancohemi nga çdo çështje politike. Na është premtuar që nga viti 2017 nga Ministria e Shëndetësisë që zgjidhja jonë do të bëhej në janar të vitit 2018. Tash ne kërkojmë këtë të drejtë tonën. Ne kërkojmë realizimin e premtimit dhe po presim që të takohemi edhe me kryeministrin”, ka thënë Halili.
Ai ka bërë të ditur se më parë janë takuar edhe me zyrtarë të MSH-së, të cilët janë zotuar se po punohet për realizimin e kërkesave të tyre. Megjithatë ata kanë thënë se dëshirojnë të dijnë një datë të caktuar se kur do të punësohen. /Gazeta Shneta/