Dhuna ndaj një kolegu në krye të detyrës ngriti në protestë mjekët e spitalit të Lezhës. Dermatologu, Zef Doda, u dhunua të enjten nga një 24 vjeçar, që më pas u vetëdorëzua në polici, pasi mjeku nuk pranoi ta vizitojë pa sistemin e referimit.
Por për bluzat e bardha, rastet e dhunës janë kthyer në shqetësim derisa vënë në dyshim vazhdimin e profesionit ndaj kërkojnë mbrojtje policore dhe një status të veçantë .
Mjeket në Lezhë pranojne se kushtet e punës së tyre bëhen edhe shkak për dhunën. Ndaj të hënën do të zbresin sërish në protestë, ndërsa një listë me kërkesa do ti drejtohet Ministrisë së Shëndetësisë.
Edmond Zefi: Ka nisur edhe nga kushtet e punës dhe mosinformimi i mirë i pacientëve për rregullat e reja që po vendosen.
Tonin Frroku: Spitali i Lezhës do të organizojë përsëri një protestë sensibilizuese dhe do të paraqesë pranë Ministrisë së Shendetësisë një listë me kërkesat e tyre.
Ministria e Shëndetësisë nga ana e saj ka kërkuar forcim të Kodit Penal për dhunën ndaj mjekëve, ndërsa ka vendosur një regjim të ri spitalor.
Por masat duket se nuk kanë dhënë efekt pasi tre nga katër rastet e sulmeve ndaj bluzave të bardha janë shënuar pas këtyre masave.
Dermatologu, Zef Doda, u dhunua me sende të forta në zyrën e tij nga një 24 vjeçar nga Mirdita i identifikuar si Eduard Lleshi, i cili u vetëdorëzuar në polici pas disa orësh.
Mësohet se në dëshminë e tij dhunuesi ka thënë se e qëlloi me grushte pasi mjeku ishte në gjendje të dehur dhe nuk po i shërbente.Në të njëjtën kohë në Tiranë u denoncua dhunimi i një specializanteje në QSUT, duke konfirmuar alarmin e mjekëve për sigurinë. /oranews