Të mbingarkuara, nervoze dhe të rraskapitura – këto janë disa nga përshkrimet që shumë gra përdorin për të shpjeguar si ndihen gjatë valëve të të nxehtit. Sipas ekspertëve, temperaturat ekstreme nuk prekin të gjithë njësoj. Për shkak të dallimeve biologjike dhe hormonale, gratë janë më të ndjeshme ndaj vapës dhe organizmi i tyre përballet me një ngarkesë më të madhe.
Mjekët e shëndetit të grave shpjegojnë se valët e të nxehtit funksionojnë si një “test stresi” për sistemin kardiovaskular, duke e vënë zemrën dhe qarkullimin e gjakut nën presion më të madh tek gratë sesa tek burrat.
Disa studime sugjerojnë madje se gratë mund të kenë një rrezik paksa më të lartë për vdekje të lidhura me temperaturat ekstreme, megjithëse nevojiten më shumë studime, shkruan BBC transmeton Gazeta Shneta.
Një nga arsyet kryesore është mënyra se si trupi i grave reagon ndaj nxehtësisë. Gratë djersijnë më pak dhe fillojnë të djersijnë vetëm kur temperatura e trupit është më e lartë. Për pasojë, organizmi e ka më të vështirë të largojë nxehtësinë e tepërt.
Përveç kësaj, ato kanë temperaturë bazale më të lartë dhe përqindje më të madhe të yndyrës trupore, e cila vepron si një shtresë izoluese që mban nxehtësinë.
Ndryshimet hormonale gjatë ciklit menstrual, periudhës së paramenopauzës, menopauzës, shtatzënisë dhe ushqyerjes me gji ndikojnë gjithashtu në aftësinë e trupit për të rregulluar temperaturën.
Para menstruacioneve, rritja e progesteronit e ngre temperaturën bazale të trupit, ndërsa gjatë menstruacioneve ulja e estrogjenit e vështirëson edhe më shumë procesin e ftohjes së organizmit.
Shumë gra raportojnë se gjatë vapës menstruacionet shoqërohen me lodhje më të madhe, marramendje, ankth, pagjumësi dhe vështirësi në përqendrim. Humbja e gjakut sjell edhe humbje të hekurit, gjë që mund të ulë furnizimin e indeve me oksigjen dhe ta rëndojë më tej punën e zemrës.
Edhe gratë në paramenopauzë ose menopauzë mund ta përjetojnë vapën më rëndë. Rënia e estrogjenit favorizon shtimin e afsheve të nxehta dhe djersitjeve gjatë natës, simptoma që mund të intensifikohen gjatë valëve të të nxehtit dhe të ndikojnë në cilësinë e gjumit dhe mirëqenien e përgjithshme.
Shtatzënia është një tjetër periudhë me rrezik më të lartë. Për shkak të rritjes së metabolizmit, nevojës më të madhe për lëngje dhe ngarkesës shtesë mbi sistemin kardiovaskular, gratë shtatzëna e kanë më të vështirë të rregullojnë temperaturën e trupit.
Studimet sugjerojnë se stresi nga nxehtësia mund të rrisë rrezikun e komplikimeve si për nënën, ashtu edhe për foshnjën.
Ekspertët paralajmërojnë se ekspozimi i zgjatur ndaj vapës mund të shkaktojë rraskapitje nga nxehtësia, ulje të tensionit arterial dhe, në raste të rënda, goditje nga nxehtësia apo probleme serioze kardiovaskulare. Për këtë arsye rekomandohet konsumimi i bollshëm i ujit, shmangia e aktivitetit fizik në orët më të nxehta të ditës, përdorimi i kremit mbrojtës nga dielli dhe ndjekja e sinjaleve që jep organizmi. /Gazeta Shneta/