Janë përzgjedhur nëntë drejtorë të klinikave në Qendrën Klinike Universitare të Kosovës.
Ka përfunduar procesi i përzgjedhjes së nëntë drejtorëve të klinikave në Qendrën Klinike Universitare të Kosovës, shkruan Gazeta Shneta.
Ndonëse me vonesë meqë do të duhej të publikuar javën e kaluar, rezultatet kanë dal sot në uebfaqen e SHSKUK-së.
Në Klinikën e Oftalmologjisë është rizgjedhur drejtor Dr. Ardian Shabani, sikurse edhe në Klinikën e Nefrologjisë ku është rizgjedhur Dr. Mimoza Berbatovci-Ukimeraj. Ukimeraj u zgjodh me 89.6 pikë ndërsa kundërkandidatja Vjollca Godanci mbeti e dyta me 80.3 pikë.
Edhe në Klinikën e Kirurgjisë Vaskulare është rizgjedhur Dr. Hajriz Rudari.
Në Institutin e Psikiatrisë Forenzike është përzgjedhur Arsim Gashi, ndërsa në Klinikën e Neonatologjisë Dr. Luan Morina i cili ka mbajtur pozitën e ushtruesit të detyrës.
Në Klinikën e Kardiologjisë është përzgjedhur Dr. Faik Shatri, kurse në Kirurgji të Fëmijëve Dr. Sejdë Statovci.
Në Urologji është zgjedhur ushtruesi i detyrës Dr. Bujar Frangu, ndërsa kundër kandidati i tij Dr. Xhevdet Çuni ka mbetur i dyti me 84.4 pikë.
Në Mikrobiologji është zgjedhur Dr. Afërdita Alaj.
Në këtë konkurs kanë qenë edhe tri pozita të tjera. Në klinikën e Mjekësisë Fizikale kandidatja Valbona Krasniqi nuk e ka kaluar fazën e parë të testimit, ndërsa janë anuluar konkurset për drejtor në Pediatri dhe Kirurgji Torakale. /Gazeta Shneta/