Këshilli Etik i Odës së Mjekëve të Kosovës ka konstatuar shkelje të lehtë në rastin e Dr. Zaim Gashit, të iniciuar nga Dr. Alban Gjonbalaj.
Ky i fundit e kishte raportuar Gashin për përdorimin e faksimiles dhe vazhdimin e punës për disa muaj, ndonëse i kishte skaduar licenca, shkruan Gazeta Shneta.
Një gjë e tillë është evidentuar edhe nga organet e Odës së Mjekëve të Kosovës. Rasti është konstatuar si Shkelje e lehtë, për çka Gashi është ndëshkuar me vërejtjen që të mos përsëris më një veprim të tillë.
“Nga Dr. Alban Gjobalaj është pretenduar që në një periudhë të caktuar ka ofruar shërbime pa licencë valide dhe nuk i është nënshtruar procesit të rilicencimit. Këshilli Etik për këtë ka konstatuar shkelje sepse ai është edhe menaxher në Klinikën e Gastroenterologjisë. Këshilli Etik ka konsideruar se Gashi nuk ka pasur obligim të kryej shërbim dhe po ashtu ato shërbime nuk kanë qenë të natyrës emergjente, që në rast të tillë ai do të detyrohej të kryente shërbim”, thuhet në një përgjigje të OMK-së për Gazetën Shneta.
Tani rasti ka shkuar në shkallën e dytë në Gjyqin e Nderit ku është duke u shqyrtuar ankesa e Gashit. /Gazeta Shneta/