Në mbledhjen e sotme të Qeverisë së Kosovës është aprovuar vendimi për themelimin e Bordit Drejtues të Fondit për Sigurimet Shëndetësore.
Ministri i Shëndetësisë, Uran Ismaili ka propozuar sot në mbledhjen e Qeverisë së Kosovës që të aprovohet vendimi për anëtarët e bordit drejtues për sigurime shëndetësore, propozim ky i aprovuar pa asnjë votë kundër.
“Në pajtim me rregulloren e punës së Qeverisë propozohet që të merret vendim për anëtarët e bordit drejtues për sigurime shëndetësore. Ministria e Shëndetësisë është e përkushtuar për sigurimet shëndetësore dhe në mënyrë që të arrihet ajo ministria është duke punuar në funksionalizimin e plotë të këtyre sigurimeve”, ka thënë ministri Ismaili, shkruan Indeksonline.
Gjithashtu Ismaili ka thënë se sipas ligjit për sigurime shëndetësore anëtarët e bordit drejtues emërohen nga Qeveria e Kosovës në bazë të propozimit të institucioneve përkatëse.
“Pas konsultimit të institucioneve përgjegjëse i propozohet qeverisë që të marrin këtë vendim dhe t’i hapin rrugë funksionalizmit të bordit të sigurimeve shëndetësore”, ka shtuar Ismaili.
Ndryshe Qeveria e Kosovës ka arritur të aprovojë propozimin për bordin drejtues të Fondit për Sigurime Shëndetësore, pa asnjë votë kundër dhe pa asnjë abstenim.
Me vendimin e aprovuar nga kabineti qeveritar është themeluar Bordi Drejtues i Fondit për Sigurimet Shëndetësore me përfaqësues nga Ministria e Shëndetësisë, Ministria e Financave, Ministria e Punës dhe Mirëqenies Sociale, Oda e Mjekëve të Kosovës, Shërbimi Spitalor dhe Klinik Universitar i Kosovës, Asociacioni i Komunave të Kosovës dhe Shoqatave të të Drejtave të Pacientëve. Pas zgjedhjes së drejtorit të Fondit, drejtori ose përfaqësuesi i tij do të jetë pjesë e bordit, në rolin e sekretarit dhe pa të drejtë vote. /Gazeta Shneta/