Kryeministri Ramush Haradinaj ka marr dje një vendim për dyfishimin e pagës së tij.
Nga 1300 euro, rroga e Haradinajt nga dhjetori do të jetë 2950 euro, shkruan Gazeta Shneta.
Por kryeministri nuk ka menduar vetëm për vete. Ai ua ka rritur pagat edhe zv.kryeministrave të cilët do të marrin nga 2500 euro në muaj dhe ministrat me 2 mijë euro.
Rrogat me rritje do t’i marrin edhe 69 zëvendësministrat e Qeverisë, e poashtu edhe pjesa tjetër e stafit si këshilltarët, të cilët do të paguhen nga 800 deri në 1400 euro.
Kjo rritje kaq e lartë e rrogave nuk do të vlejë edhe për shërbyesit civil në Kosovë dhe as për mjekët.
Këta pritet t’i marrin rrogat me rritje nga janari, por me vetëm 5 për qind më shumë.
Kështu është paralajmëruar nga Ministria e Financave, ku është bërë e ditur se në projektbuxhetin e vitit 2018 ka hyrë edhe rritja e pagave me 5 për qind.
Punëtorët shëndetësorë në fillim të këtij viti organizuan protesta dhe greva me kërkesa për rritjen e pagave me 15 për qind.
Federata e Sindikatave të Shëndetësisë pati nënshkruar një marrëveshje me koalicionin qeverisës, për të cilën kryetari Blerim Syla kishte deklaruar se nuk është duke u zbatuar. /Gazeta Shneta/