Me anë të një vendimi, Qeveria ka themeluar një Komision Disiplinor për rastin e Kryeshefit të Agjencisë për Produkte dhe Pajisje Medicinale, Jeton Shala. Në Komision është një zëvendëskryeministër, dy ministra dhe dy sekretarë ministrie
Agjencia Kundër Korrupsionit ka kërkuar në janar të këtij viti nga ministri i Shëndetësisë, Uran Ismaili, që të nisë procedurë disiplinore ndaj Jeton Shalës, kryeshef i Agjencisë Kosovare për Produkte dhe Pajisje Medicinale.
Kërkesa ishte bërë në lidhje Gëzim Shabanin, i cili ishte punësuar në vitin 2016 derisa në të njëjtën kohë ishte edhe këshilltar komunal në Komunën e Mitrovicës nga radhët e PDK-së, shkruan Gazeta Shneta.
“Gjatë shqyrtimit të dokumentacionit të siguruar nga AKPPM gjen së Gëzim Shabani, përderisa ka qenë këshilltar komunal në Komunën e Mitrovicës nga radhët e Partisë Demokratike të Kosovës, kishte pasur me AKPPM-në një marrëveshje për shërbime të veçanta nga data 18.3.2016 e me validitet deri gjashtë muaj, përkatësisht deri më datën 18.9.2016, sipas konkursit me referencë 2.2016 të datës 22.2.2016”, thuhet ndër të tjera në kërkesën e AKK-së.
E për këtë rast Ministria e Shëndetësisë ka kërkuar nga Qeveria e Kosovës që të themelojë një Komision Disiplinor.
Me një vendim të datës 20 shkurt të siguruar nga Gazeta, Qeveria ka themeluar këtë komision me përbërje të zëvendëskryeministrit Dalibor Jevtic, kryesues; ministri i Administratës Publike, Mahir Yagcilar; ministrja e Integrimit, Dhurata Hoxha; Kapllan Halimi, Sekretar i Përgjithshëm në MBPZHR; si dhe Veton Firzi poashtu Sekretar në MKRS.
Sipas këtij vendimi, Komisioni Disiplinor për shqyrtimin e rastit do të bazohet në Ligjin për Shërbimin Civil të Kosovës me rregulloren 06/2012 për Pozitat e Larta Drejtuese në Shërbimin Civil. /Gazeta Shneta/