Drejtori i Qendrës Kryesore të Mjekësisë Familjare në Drenas, Ismet Bogiqi, ka dhënë detaje të hollësishme rreth furnizimit me barna dhe sfidave të aktualizuara që po ballafaqohet qendra mjekësore, shkruan Gazeta Shneta.
Bogiqi ka treguar se për vitin 2023 furnizimi nga Ministria e Shëndetësisë ka qenë rreth 40% sipas Listës Esenciale.
Në lidhje me mungesat, Bogiqi tha se ato janë relative nga muaji në muaj varesisht nga furnizimi i MSh-së.
“Shumica e barnave esenciale kronike janë prezentë në stokun e Barnatores, me përjashtim të vogël kur hargjohet sasia pasi kemi fluks të madh të pacienteve në këto muajt e fundit”, ka thënë ai.
Drejtori i QKMF shpjegoi se janë të furnizuar me insulinë dhe vaksina në përputhje me kërkesat mujore, andaj është arritur që t’i plotësojnë të gjitha nevojat në vitin 2023.
Gjithashtu, ai theksoi se pjesa tjetër e furnizimit, përfshirë materialin shpenzues mjekësor, është kryesisht e mbuluar nga Ministria e Shëndetësisë dhe kontrata kornizë 3-vjeçare.
“Mungesat që i kemi prej furnizimit të MSH i plotësojmë duke blerë tek Operatori Ekonomik i kontraktuar. Jemi shumë mirë të furnizuar dhe i mbulojmë 95% të kërkesave të pacientëve që kërkojnë ofrimin e shërbimeve shëndetësore në komunën tonë.” u shpreh Bogiqi
Bogiqi diskutoi edhe nevojat e tjera të QKMF-së.
Ai shprehu nevojën për një objekt të ri, rekrutimin e stafit shtesë, dhe trajnimin e mjekëve për përdorimin e ultrazërit.
Gjithashtu, ai shprehu kënaqësinë për rritjen e numrit të profesionistëve shëndetësorë në 24 nga Ministria e Shëndetësisë në vitin 2023.
Por në anën tjetër ai tregoi disa sfida aktuale, duke përfshirë vështirësitë në mbajtjen e personelit mjekësor dhe mungesën e interesit për specializimin në mjekësi familjare.
“Si brengë, kemi personelin shëndetësor, ku mjekët nuk janë të interesuar për specializimin në Mjekësi familjare, dhe levizja e tyre është nderprerja e njëanshme e kontratave me institucionin për arsye të lemive të tjera të specializimit.” – theksoi Bogiqi. /GazetaShneta/