Bazuar në deklaratën e Fevzi Sylejmanit, drejtorit të Qendrës Kryesore të Mjekësisë Familjare në Mitrovicë të dhëna për Gazetën Shneta, situata e furnizimit me medikamente është shqetësuese për komunitetin lokal.
“Si edhe gjitha QKMF tjera edhe ne nuk jemi të furnizuar me medikamente nga LEB. Raporti i vitit 2023 tregon se mesatarja e furnizimit është realizuar 40%. Kërkesat nuk janë përmbushur si në mënyrë kualitative, po ashtu edhe kuantitative”, tha ai.
Në lidhje me mungesën e medikamenteve, ai shprehet se ka mungesë të terapive e medikamenteve që i duhen një QKMF-je.
“Ka mungesë të terapive ampulare me antibiotik, antireumatik, analgjetik, diuretik, si dhe steroide terapisë medikamentoze orale për sëmundje kronike masovike jo ngjitëse, si diabet, hipertension, SPOK”, shtoi Sylejmani.
Gjithashtu, Sylejmani ka thënë se disa nga medikamentet me të cilat furnizohemi, si p.sh. për hipertension, nuk përdoren sipas UPK (enalapril).
Drejtori i QKMF-së në Mitrovicë konfirmon se sa i përket insulinave dhe vaksinave jemi të furnizuara dhe nuk kemi asnjë problem.
Situata me materialin shpenzues raportohet të jetë e ngjashme me atë të medikamenteve.
Në lidhje me infrastrukturën dhe investimet, Sylejmani falënderon kryetarin për përqëndrimin në shëndetësi.
“Po ashtu, shto edhe infrastruktura është e rinovuar apo është në proces të plotë renovimi”, tha drejtori.
Për nevojën për staf shtesë dhe procesin e rekrutimit, ai thotë se nuk ka nevojë për staf shtesë.
“Sa i përket stafit, nuk kemi nevojë për staf shtesë meqenëse numri i personelit aktual është në vijë të plotë me numrin e personelit të lejuar nga Ministria. Procedurat e rekrutimit gjatë viteve 2022/2023 janë zhvilluar për 69 punëtorë të profileve të ndryshme, ndërsa tani jemi në procedura edhe për 21 punëtorë të rinj”, u shpreh Sylejmani.
Në fund, drejtori thekson se të gjitha mungesat në furnizim me medikamente dhe material shpenzues jemi duke i kompensuar nga buxheti komunal.
“Duhet të theksohet se të gjitha mungesat në furnizim me medikamente dhe material shpenzues po i kompensojmë nga buxheti komunal në vlerë rreth 300.000 euro”, tha në fund drejtori i Qendrës Kryesore të Mjekësisë Familjare në Mitrovicë, Fevzi Sylejmani./GazetaShneta/