Qendra Klinike Universitare e Kosovës i është përgjigjur Gazetës Shneta në pretendimet e disa kandidatëve në konkursin për specialistë, se nuk po lejohen t’i shikojnë testet e tyre.
Nga QKUK kanë deklaruar se kandidatët që kanë parashtruar kërkesa do të lejohen t’i shikojnë testet.
“Në lidhje me kërkesat e paraqitura për qasje në dokumente publike respektivisht testimin me shkrim nga disa kandidatë specialistë pjesëmarrës në konkursin për punësimin e specialistëve në Qendrën Klinike Universitare të Kosovës (QKUK), ju njoftojmë se jemi në dijeni të shqetësimeve të ngritura lidhur me qasjen në testet pas publikimit të rezultateve. Kandidatët që kanë parashtruar kërkesa janë nga fusha të ndryshme mjekësore, përfshirë oftalmologjinë, radiologjinë dhe lëmi të tjera”, kanë deklaruar nga QKUK.
Nga ky institucion thonë se janë duke i shqyrtuar kërkesat dhe do të përgjigjen brenda afateve ligjore.
“Theksojmë se të gjitha kërkesat e pranuara do të trajtohen me seriozitet të plotë, në përputhje me kornizën ligjore në fuqi dhe brenda afateve ligjore të përcaktuara. Gjatë shqyrtimit të këtyre kërkesave do të merret parasysh edhe sqarimi dhe udhëzimi i dhënë nga Zyrtari i Lartë për Mbrojtjen e të Dhënave Personale, me qëllim të respektimit të legjislacionit për mbrojtjen e të dhënave personale, duke garantuar njëkohësisht transparencë dhe trajtim të barabartë për të gjithë kandidatët. Për çdo zhvillim të mëtejmë, palët do të njoftohen me kohë dhe brenda afateve ligjore, sipas procedurave zyrtare”, kanë deklaruar nga QKUK.
Njëri nga kandidatët me kod 779, i ka thënë Gazetës Shneta se ka bërë kërkesë më datë 19 janar për të rishikuar testin, por kjo nuk i është lejuar ende nga administrata e QKUK-së. /Gazeta Shneta/