Qendra Klinike Universitare e Kosovës po vazhdon të përballet me mungesa të shumta të medikamenteve dhe materialeve medicinale. Në sezonin e rrezikut nga kafshimi i gjarpërinjve QKUK posedon kundërhelmin vetëm për raste emergjente – ndërsa në këtë institucion po vazhdon mungesa e kontrastit për radiologji
Gazeta Shneta ka mësuar nga burime se në QKUK mungon serumi kundër kafshimit të gjarpërinjve, por zyrtar të këtij institucioni kanë mohuar duke thënë se në Klinikën Infektive ka sasi të këtij medikamenti.
Por sasia ekziston vetëm për rastet emergjente, ndërkaq QKUK pritet të furnizohet në fund të muajit me sasi të mjaftueshme.
“Zyra për informim në QKUK, ju njofton se në Klinikën Infektive të QKUK-së, ka sasi të serumit për raste emergjente. Ndërsa për furnizim të mëtejmë me serum kundër kafshimit të gjarpërit, tenderi është në procedurë të prokurimit ku pritet të bëhet hapja e ofertës, me 31 maj 2019”, thuhet në përgjigjen e QKUK-së.
Vonesën e furnizimit QKUK e ka arsyetuar me dështimin e procedurave të mëparshme pasi ka pasur vetëm një ofertues i cili ka qenë i papërgjegjshëm.
Ndërkaq zyrtarët e QKUK-së kanë deklaruar se klinika e Radiologjisë pritet të furnizohet së shpejti me kontrast, material ky i cili ka munguar tash e disa muaj. /Gazeta Shneta/