Pacientët në Qendrën Klinike Universitare të Kosovës, po detyrohen që me shpenzime personale t’i blejnë gjilpërat dhe penjtë kirurgjikë.
Përveç kësaj, atyre ju kërkohet të blejnë edhe mantelet sterile të mjekëve në mungesë të furnizimit nga Minstria e Shëndetësisë.
M.M. ka shpenzuar hiç më pak se 30 euro mëngjesin e së premtes (dje) për të blerë shiringa, gjilpëra e penj kirurgjikë, të cilët i nevojiteshin për operimin e një familjari të tij në Qendrën Klinike Universitare të Kosovës (QKUK).
Njëjtë si ai edhe pacientët e tjerë të QKUK-së po detyrohen t’i blejnë gjilpërat dhe penjtë kirurgjikë, madje edhe mantelet sterile të mjekëve, në mungesë të furnizimit të nevojshëm nga Ministria e Shëndetësisë.
“Unë jam operuar prej zorrës qorre dhe komplikimeve në zorrë të trashë. Mjetet më të thjeshta, si shiringat e injeksionet, duhet t’i blejmë vetë. Barnat më të shtrenjta i japin në spital”, ka thënë për “Zërin” Ardian Zekaj, nga Peja.
Në lidhje me mossigurimin e materialeve shpenzuese për pacientë gazeta “Zëri” ka komunikuar edhe me zyrtarë për informim në QKUK, por sipas tyre, buxhetin për furnizim me barna dhe me materiale shpenzuese e ka Ministria e Shëndetësisë dhe se duhet të flasim me ta.