Ministria e Shëndetësisë tash e disa muaj i ka lënë pacientët e sëmurë me diabet pa insulina.
Dy nga tre llojet e insulinave ende nuk janë kontraktuar nga MSH-ja, gjë që ka bërë që qytetarët të kërkojnë këto ilaçe edhe në vendet e rajonit, shkruan Gazeta Shneta.
Një qytetar ka kërkuar ndihmë në grupin “Netëork Prishtina” në Facebook, për të gjetur insulinën “Novomix”, pasi e njëjta nuk gjendet as në tregun privat.
Atij i janë përgjigjur një numër i qytetarëve të cilët e kanë rekomanduar ta kërkojnë në vendet e rajonit si në Maqedoni e Shqipëri.
Në Kukës është raportuar se janë rritur kërkesat për insulina nga qytetarët e Kosovës. Farmacistët e barnatoreve private atje, kanë deklaruar se në javët e fundit një numër i konsiderueshëm i kosovarëve kanë blerë insulina në këtë qytet.
Ministri i Shëndetësisë Arben Vitia para disa ditësh në Komisionin Parlamentar për Shëndetësi ka deklaruar se për shkak të ankesave në OSHP është bllokuar blerja e insulinave, por ai ka shtuar se do të kontraktohen përmes procedurave emergjente me kontratë katër muaj. /Gazeta Shneta/