Prof. Lul Raka ka insistuar sërish për testimin e 200 deri 300 rasteve në ditë të dyshuar me koronavirus. Por këtë e ka kundërshtuar drejtori i Institutit Prof. Naser Ramadani gjatë ditës së djeshme në një konferencë për media ku ka deklaruar se s’ka arsye për testimin e kaq shumë njerëzve
Raka ka deklaruar se me ardhjen e kontingjentit të ri prej 7 mijë testeve, numri i tyre duhet të rritet nga 200 deri në 300 brenda ditës.
“Tashmë kemi një kontingjent të ri prej 7,000 testesh dhe mendoj se duhet të dyfishohen kapacitetet testuese. Mirë është të testojmë 200-300 njerëz në ditë, sipas radhës së prioriteteve. Në gjurmimin e kontakteve, sipas studimeve të fundit, për ta kontrolluar përhapjen e epidemisë, duhet të gjurmohen së paku 70% e kontakteve të afërta. Kjo shifër është variabile, por nëpër ngjarjet e grumbullimit të njerëzve, ky numër mund të jetë edhe treshifror. Mesatarja e njerëzve që duhet gjurmuar si kontakt i afërt është 36. Kjo shifër shpesh është sfiduese për ta arritur”, ka deklaruar Raka për REL.
Raka ka deklaruar se sërish se deputetët e Kuvendit të Kosovës të cilët kanë qëndruar 12 orë në seancën e fundit poashtu duhet të testohen.
“Udhëzimet për prioritetet e testimit po ashtu janë dhënë nga institucionet ndërkombëtare. Prioritet për testim janë pacientët e hospitalizuar apo ata në komunitet me infeksion akut respirator, stafi shëndetësor, të moshuarit dhe personat me sëmundje kronike që kanë simptoma dhe të gjithë kontaktet e afërta të një pacienti të sëmurë me COVID-19”.
“Mirëpo, secili shtet mund t’i adaptojë këto standarde sipas situatës së vet epidemiologjike dhe mund të testojë edhe raste të tjera, varësisht kapaciteteve që disponon. P.sh. në vendin tonë, si qasje shtesë në diagnozë mund të jenë njerëzit që kanë qëndruar në tubime, të cilat konsiderohen si ngjarje super-shpërndarëse të virusit (dasmat, vizitat e gjera familjare, vizitat te lehonat, deputetët që qëndrojnë nga 12 orë në një vend etj.). Një grup tjetër që testohen në botë janë edhe punëtorët e shërbimeve publike emergjente (policia, furnizuesit, bukëpjekësit, etj.)”, ka deklaruar Raka.
Këto rekomandime të mikrobiologut Raka i ka refuzuar drejtori i Institutit Kombëtar epidemiologu Prof. Naser Ramadani, shkruan Gazeta Shneta. Sipas tij nuk ka nevojë të bëhen teste vetëm sa për të përmbushur normativet.
“Rekomandimet nuk janë normativ ditor por rekomandime që në rast nevoje shkojnë deri në këto shifra. Laboratori mund t’i bëj këto shifra por nuk mund të bëjmë shifra ditore vetëm sa për të mbush normativat sepse janë problem logjistika dhe resurset humane, por cdo rekomandim është i mirëseardhur”.
“Çdo deputet është qytetar i Kosovës dhe të gjithë i nënshtrohen protokolleve të Institutit, MSH-së dhe OBSH-së, të cilat nënkuptojnë se çdo kush që ka shenja dhe simptoma klinike për koronavirus duhet të testohet. Asnjëri nuk është i përjashtuar, por protokolleve duhet t’i përmbahemi në mënyrë strikte”, ka thënë Ramadani ditën e djeshme gjatë një konference në Ministrinë e Shëndetësisë. /Gazeta Shneta/