Qeveria e Kosovës ka planifikuar lehtësimin e masave anti covid.
Zëdhënësja e Qeverisë së Kosovës, Antigona Baxhaku tha për Telegrafin se kanë propozuar që të hiqet ora policore për komunat që janë në zonë të kuqe.
“Është propozuar heqja e orës policore, nuk do të ketë kufizim të lëvizjes. Studentët po ashtu do të mbajnë ligjerata në objektet e fakulteteve, kurse bizneset që janë në zonë të kuqe do të lejohen të punojnë deri në ora 22:00”, tha ajo.
Mirëpo, ky vendim nuk po i duket i arsyeshëm, Prof.Dr.Lul Rakës.
Në rrjetin social “Facebook” ai ka shprehur pakënaqësi me lirimin e masave anti covid.Sipas tij, në këtë formë po mundësohet përhapja e Covid-19.
Postimin e plotë të tij mund ta lexoni më poshtë.
Të nderuar/a,
Sot, në media e pashë një shkresë zyrtare të qeverisë, në të cilën kërkohet lirimi i masave kufizuese “ në bazë të rekomandimeve të IKSHPK dhe Bordit Këshilldhënës”.
E shoh të arsyshme të jap një sqarim se as unë, si kryesues i Bordit dhe asnjë anëtar i Bordit nuk është konsultuar për një propozim të tillë.
Në kohën e shkeljes masive të masave parandaluese gjatë fushatës zgjedhore e parazgjedhore nga tërë spektri politik; shtritjes së variantit britanik të virusit, i cili është prezent në Kosovë që nga fundi i dhjetorit , çdo “lehtësim politik i masave” mundëson përhapjen e infeksionit në komunitet duke kërcënuar shëndetin publik e individual në Kosovë. Prandaj, unë jam kundër lirimit të masave në këtë kohë.