Shërbimi Spitalor Klinik Universitar ka dal me një reagim të çuditshëm ndaj Fakultetit të Mjekësisë duke u përzier në kompetencat e Universitetit të Prishtinës.
Fakulteti i Mjekësisë ka publikuar orarin e mësimit dhe për këtë ka reaguar SHSKUK, gjë që nuk i përket këtij institucioni dhe organizimit të tij, shkruan Gazeta Shneta.
“Shërbimi Spitalor Klinik dhe Universitar i Kosovës shprehet i shqetësuar me zhvillimet e fundit në Fakultetin e Mjekësisë pas shpalljes të orarit të mësimit nga menaxhmenti i fakultetit. Ky orar nuk është konform rregullores së re të nxjerr nga organi më i lartë të Universitetit të Prishtinës, Këshilli Drejtues, të miratuar me 22 shtator 2022”, thuhet në reagimin e SHSKUK-së.
Ky reagim vjen në kohë kur është ndryshuar rregullorja nga Këshilli Drejtues i UP-së, gjë që i hap rrugë disa asistentëve të avancohen në profesorë.
Reagimi i plotë nga SHSKUK:
Shërbimi Spitalor Klinik dhe Universitar i Kosovës shprehet i shqetësuar me zhvillimet e fundit në Fakultetin e Mjekësisë pas shpalljes të orarit të mësimit nga menaxhmenti i fakultetit.
Ky orar nuk është konform rregullores së re të nxjerr nga organi më i lartë të Universitetit të Prishtinës, Këshilli Drejtues, të miratuar me 22 shtator 2022.
Mbajtja e mësimit me numër të grupimeve në kundërshtim me rregulloren e re është sinjal që FM po kundërshton hapjen e kësaj njësie akademike për stafin akademik meritor.
Ne si SHSKUK i jemi gëzuar rregullores të re nga Këshilli Drejtues i UP, sepse përmes saj do të rregullohet afatgjatë problemi me mungesën e stafit akademik me titull të profesorit në klinikat dhe institutet e SHSKUK.
Rikujtojmë që sipas statutit të QKUK, neni 12, klinikat nuk mund të themelohen pa pasur profesorë. Në situatën e rëndë të krijuar në vitet e fundit, shumë prej klinikave të QKUK rrezikojnë funksionimin për shkak të mungesës të profesorëve.
Klinikat dhe institutet e SHSKUK kanë staf akademik meritor të mjaftueshëm për tu zgjedhur në pozitën e profesorit, prandaj situata e krijuar është absurde (sepse stafi meritor ekziston) por e rrezikshme (sepse e vështirëson funksionimin e klinikave si njësi të pavarura nga mungesa e avancimit të stafit meritor.
Në këto kushte SHSKUK është e gatshme të ofrojë mbështetjen e saj përmes infrastrukturës të cilën e ka në dispozicion për realizimin e veprimtarisë arsimore sipas rregullores të re të miratuar nga Këshilli Drejtues i UP.
Kërkojmë nga organet kompetente në UP(Këshilli Drejtues, Rektorati, Senati) që të marr masat e nevojshme sipas rregullave në fuqi për të zbatuar rregulloren e re në praktikë në Fakultetin e Mjekësisë.