Punimet për renovimin e Klinikës Emergjente në QKUK, që pritet të përfundojnë deri në fund të vitit, do të sjellin edhe shërbime moderne sipas drejtorit Dr. Basri Lenjani
Ariana Ismaili
Para dy muajsh ka nisur renovimi i Klinikës Emergjente në Qendrën Klinike Universitare të Kosovës. Punimet pritet të përfundojnë deri në fund të vitit kur klinika do të ketë kapacitete të shtuara dhe shërbime të reja.
Drejtori i kësaj klinike, Dr. Basri Lenjani, ka bërë të ditur se është siguruar aparaturë e re moderne diagnostike dhe monitoruese e poashtu edhe shtretër dhe inventar për personelin, shkruan Gazeta Shneta.
“Ne kemi bërë një kërkesë të tillë që në vitin 2007 për renovim në Klinikën Emergjente. Ky është investim mëse i nevojshëm dhe i qëlluar sepse do rritet cilësia e shërbimeve”, ka thënë Lenjani. Ai ka deklaruar se aty do të punojnë grupe vullnetare infermierësh, që do të ofrojnë shërbime parësore për pacientët derisa ata të dorëzohen tek mjekët.
“Në ditët në vijim do të nënshkruhet ky projekt, nga drejtori i SHKUK-së, Dr. Basri Sejdiu, dhe nga kryetarja e Kryqit të Kuq të Kosovës, Feride Hyseni”, ka thënë Lenjani. Shërbime të tilla vullnetare nga personel mjekësor, sipas Lenjanit, janë bërë në vendin tonë në periudhën e pasluftës nga viti 1999 deri në vitin 2002.
Lenjani bërë të ditur se hyrja dhe qarkullimi brenda hapësirës së re në Emergjencë, do të bëhet me kartela pas përfundimit të punimeve.
“Në hapësirat brenda objektit do të bëhet hyrja me kartela dhe do të kenë qasje vetëm pacientët dhe personeli”, ka shtuar mjeku. Në këtë mënyrë, sipas tij, do të ulët kaosi sepse qytetarët nuk do të kenë mundësi për qarkullim të panevojshëm brenda klinikës siç ka ndodhur deri më tani. Lenjani është zotuar se do të përkujdeset që klinika të cilën e udhëheq të mos ketë mungesë të barnave. /Gazeta Shneta/