Në Qendrën Klinike Universitare të Kosovës, nuk aplikohen masat mbrojtëse nga rrezatimi jonizues i rëntgenit.
Një aparat i tillë gjendet në bodrumin e objektit të Kirurgjisë, ku siç shihet në fotografi të dërguara nga një pacient, nuk ka masa mbrojtëse, shkruan Gazeta Shneta.
Aty pari mund të kalojnë pacientë e vizitorë të moshave të ndryshme, dhe i vetmi parandalim nga rrezatimi është një mbishkrim në derë “Kujdes rreze X”. Por nuk mjafton me kaq, pasi rreziku nga rrezet X është shumë më i madh dhe kërkon mbrojtje.
Kjo dhomë duket se nuk i plotëson as kushtet që i kërkon Udhëzimi Administrativ numër 03/2007 për Aplikimin e rrezeve jonizuese i Ministrisë së Shëndetësisë.
Ky Udhëzim përcakton që objekti në të cilin zhvillohet kjo veprimtari “muret, tavani dhe dyshemeja duhet të jenë të mbështjellura me folie plumbi, llaç të baritit, tulla të baritit apo beton me trashësi adekuate që të mos lëshoj dozat absorbuese të rrezatimit jonizues”.
Poashtu dyert dhe dritaret duhet të jenë të mbuluara me plumb ose xham plumbi sipas intensitetit dhe energjisë së burimit.
Ndërsa në nenin 4 të këtij udhëzimi, kërkohet që në zonën e rrezatimit jonizues të mos punojnë personat më të ri se 18 vjeç.
Në një fushatë të Agjencisë së Kosovës për Mbrojtje nga Rrezatimi dhe Siguria Bërthamore, thuhet se rreziku për kancer i shkaktuar nga rrezatimi është i ulët, por është shtesë mbi rreziqet e tjera që shkaktojnë kancer.
“Për secilin ekzaminim mjekësor, pacientit i rritet sado pak ky rrezik. Prandaj gjatë imazherisë diagnostiko rekomandohet, mbajtja e dozës për pacientit në minimum. Probabiliteti për kancer të shkaktuar nga rrezatimi rritet 5-6% për çdo 1000 mSv të dozës”.
“Rritja e rrezikut për kancer nga shumica e ekzaminimeve është relativisht e vogël në krahasim me rrezikun nga kanceri për shkaqe natyrore që mund të shfaqet gjatë gjithë jetës, i cili është ndërmjet 14% për vendet e pazhvilluara dhe 40% për vendet e zhvilluara”. /Gazeta Shneta/
