Mjeku i ri Besim Demolli ka specializuar në reumatologji para dy ditësh. Njëri nga mjekët i cili ishte anëtar i Komisionit, Ali Lahu, ka vetëm fjalë të mira për Demollin.
Lahu e ka krahasuar specialistin e ri me profesorët eminent Jusuf Rexhepi dhe Remzi Izairi, ndërsa e ka quajtur artist të propedeutikës, transmeton Gazeta Shneta.
Lexoni postimin e tij të plotë:
Me shkas,
Propedeutika është arti i mjekësisë klinike, ndërsa propedeutiku i mirë është një lloj artisti kliniko-skenik para pacientit dhe auditorit prezent.
I tillë ishte kandidati Besim Demolli i cili specializoi në Reumatologji para dy ditësh.
Ai, me kreativitetin, shkathtësinë dhe njohuritë e thella në lëminë ku specializoi, na solli përfytyrimin e profesorëve eminentë të propedeutikës klinike, Jusuf Rexhepit dhe Remzi Izairit.
Kjo ishte diçka e veçantë e që nuk e kishim hasur kurrë në këto përmasa nga specializantët tjerë, për më tepër kur me zhvillimin e teknologjisë mjekësore afërsia me pacientin qoftë edhe me një prekje pulsi, palpacion a auskultim po bëhet gjithnjë e më e rrallë
Sot, fatkeqësisht ndodh që më parë shikohet analiza, grafia, raporti ekosonografik apo raporti i RM-së se vetë pacienti.
Fare në fund, në këtë kohë kur nëpërkëmben vlerat, mendoj se Besimi duhet të ketë vend në QKUK dhe klinikën e Reumatologjisë, në mënyrë që arti i ekzaminimit të mirëfilltë propedeutik të ruhet, të kultivohet dhe të përcillet edhe në gjeneratat që do vijnë pas nesh. Besimi është maestro i këtij arti klinik. Andaj t’i ndihmojmë dhe t’i japim kurajo në rrugëtimin e tij.