Gjatë ditës së sotme janë shpallur rezultatet e testit me shkrim në konkursin për drejtorë të tetë klinikave në Qendrën Klinike Universitare të Kosovës.
Testi me shkrim ka sjellë konkurrencë të fortë në Klinikën e Gjinekologjisë, të cilin e kanë kaluar katër kandidatë. Me më së shumti pikë ka dal Dr. Jakup Ismaili me 80 sosh, duke lënë prapa Dr. Fehmi Ahmetin me 76. Në vendin e tretë është ushtruesja e detyrës së drejtorit, Dr. Myrvete Paçarada me 75 pikë, ndërsa në të katërtin Dr. Shpresa Krasniqi me 52 pikë. Testin nuk kanë arritur ta kalojnë Dr. Zef Ndrejaj me 33 pikë dhe Dr. Brikenë Dacaj me vetëm 28, shkruan Gazeta Shneta.
Në Klinikën e Neurokirurgjisë testin e ka kaluar vetëm Dr. Arsim Morina me 69 pikë. Dr. Faik Qosaj ka marr vetëm 27 pikë, ndërsa Dr. Fatos Kelmendi ka abstenuar. Njëjtë ka ndodhur edhe në dy klinika tjera. Testin për Emergjencë e ka kaluar vetëm Dr. Basri Lenjani me 58 pikë, ndërsa Dr. Arbër Hamiti ka rezultuar me 35 dhe Dr. Premtim Rashiti me 19 pikë. Edhe në Kardiologji Dr. Imri Jashari do të hyjë në intervistë i vetëm pasi kaloi testin me 71 pikë, derisa kundërkandidatët e tij nuk kanë arritur të kalojnë. Dr. Ibrahim Lepaja ka marr 31 pikë, Dr. Agim Krasniqi 15 dhe Dr. Artan Ahmeti ka munguar.
Ndërkaq konkurrencë ka edhe në Klinikën e Radiologjisë ku testin me shkrim e kanë kaluar katër kandidatë. Dr. Bujar Gjikolli ka dal me rezultat 87 pikë, ndërsa ushtruesja e detyrës së drejtorit Dr. Serbeze Kabashi me një pikë më pak. Dr. Arben Kutllovci është vlerësuar nga Komisioni me 80 pikë dhe Gani Morina me 78 sosh. Dr. Kreshnike Dedushaj nuk ka kaluar testin pasi ka marr vetëm 43 pikë.
Në Klinikën e Kirurgjisë së Fëmijëve prin Dr. Nexhmi Hyseni me 76 pikë, i cili ka udhëhequr deri më tani. Pas tij vjen Dr. Murat Berisha me 70 dhe Dr. Hysni Jashari me 69 pikë. Tre kandidatë kanë kaluar testin edhe në Klinikën e Ortopedisë. Dr. Gani Jashanica është vlerësuar me 61 pikë, ndërsa një pikë më pak e ka Dr. Arbër Tolaj. Dr. Blerim Qosaj ka fituar 56 pikë, ndërsa Dr. Sabit Sllamniku nuk e ka kaluar testin.
Më së shumti pikë nga kundërkandidatët ka marr drejtori i Klinikës së Anestezionit, Dr. Nehat Baftiu. Ai është vlerësuar me 78 pikë, duke lënë prapa Dr. Rexhep Gjyliqin me 18 pikë më pak. Dr. Qamile Morina ka përfunduar testin me 52 pikë, ndërsa Dr. Mentor Alimusa nuk e ka kaluar.
Kandidatët që kanë kaluar testin me shkrim me mbi 50 pikë, do të ftohen në intervistë me gojë. /Gazeta Shneta/