Nëna Aurora S. që solli në jetë trinjakë më 4 maj, falënderon mjekët e QKUK-së për kujdesin ndaj saj. Mjekët tregojnë për operacionin cezarian dhe për shëndetin e bebeve
Nëna Aurora S. në shtatzëninë e parë solli në jetë fëmijë trinjakë, dy djem dhe një vajzë. Ajo tregon se fillimisht i kishin thënë se ka binjakë, ndërsa më vonë ishte zbuluar me ultrazë se do të bëhet nënë e trinjakëve, shkruan Gazeta Shneta.
“Kam qëndruar 2 javë në Patologji ndërsa më 4 maj kam lindur trinjakët. Në fillim kanë qenë pak me shëndet të dobët, por fal mjekëve dhe kujdesit të tyre janë mirë. Lindja është kryer në javën e 33-të me operacion cezarian nga mjeku Zef Ndrejaj. Gjithçka ka shkuar mirë, operacioni dhe kujdesi i mjekëve”, ka deklaruar nëna.
Ajo thotë se nuk ka pasur frikë nga lindje, por ka pasur shumë emocione kur i ka lindur fëmijët. Aurora ishte edhe e shqetësuar pasi nuk i ka pasur afër vetes në momentet e para.
Drejtori i Gjinekologji, Dr. Jakup Ismaili ka bërë të ditur se operacioni është kryer me prerje cezariane, por procedura në këtë rast ka qenë normale ndonëse ka qenë lindje me trinjakë.
Nëna tregon se trinjakët i ka pagëzuar me emrat Aron, Klea dhe Rian. Dy djemtë kanë ardhur në jetë me peshë mbi 2200 gramë, ndërsa vajza 1200. Kjo e fundit po qëndron ende në inkubator për shkak të peshës së ulët dhe pamundësisë për t’u ushqyer me gji apo biberon.
Kurse drejtori i Neonatologjisë Dr. Xhevdet Gojnovci, deklaron se për momentin bebet janë mirë, përveç trinjakut të tretë i cili pritet të pavarësohet nga sonda dhe të shtohet pesha. “Pasi fillon të ushqehet me biberon ose me gjirin e nënës, atëherë do të lirohet për në shtëpi”, ka deklaruar Gojnovci. /Gazeta Shneta/