Rreth 80 mjekë, infermierë dhe profesionistë të tjerë nga Serbia kanë hyr sot në Kosovë pa iu nënshtruar procedurave të licencimit në odat përkatëse. Ministria e Shëndetësisë ka deklaruar se ata janë vetëm në cilësinë e monitoruesve
Përmes pikës kufitare Merdare, dhjetëra automjete, në mesin e tyre edhe Autoambulanca janë futur në Kosovë nga Serbia. Raportohet se të gjithë që hyrën në Kosovë janë nga personeli shëndetësor (punëtorë teknik, mjekë e infermierë) që punojnë në spitale serbe, ku edhe jetojnë, por që të njëjtit nuk janë futur në karantinë.
Ndonëse 20 vetura dhe 5 ndihma të shpejta hyrën sot, Ministria e Shëndetësisë thotë se bëhet fjalë për 14 persona, 10 mjekë dhe 4 infemierë, e sipas këtij institucioni, thuhet se të njëjtit kanë marrë edhe leje, për të monitoruar situatën me koronavirus në veri të vendit.
Indeksonline ka publikuar listën me emrat e të gjithë punonjësve shëndetësor që erdhën në Kosovë, e që bëhet fjalë për plot 82 persona.
Sipas ligjeve në fuqi në Kosovë profesionistët e huaj që vijnë në Kosovë për të kryer çfarëdo shërbimi duhet të i nënshtrohen procedurave për licencim. Në këtë rast sipas MSH-së profesionistët serbë do të kryejnë monitorim të situatës me koronavirus.
Për ardhjen e këtyre mjekëve dhe infermierëve serbë kanë reaguar odat e profesionistëve shëndetësore. Oda e Mjekëve të Kosovës në një reagim publik ka alarmuar institucionet e Kosovës se ardhja e mjekëve serbë ka cënuar sistemin shëndetësor dhe ligjin në Republikën e Kosovës.
OMK ka deklaruar se ardhja e tyre cënon edhe dinjitetin e mjekëve të Kosovës, të cilët janë të përgatitur mjaftueshëm dhe të gatshëm për ta monitoruar situatën për secilin qytetarë të Kosovës. /Gazeta Shneta/