Tash e dy dekada punë në kirurgjinë invazive, kardiologu në Qendrën Klinike Universitare të Kosovës, Dr. Dat Gorani, vazhdon të jetë një nga profesionistët më të angazhuar në trajtimin e sëmundjeve të zemrës.
Ai tregon se vetëm gjatë vitit të kaluar në Klinikën e Kardiologjisë janë realizuar 4,078 procedura diagnostike dhe mbi 2,600 ndërhyrje invazive, ndërsa vetë gjatë karrierës së tij ka kryer mbi 700 procedura të stentimit, shkruan Gazeta Shneta.
“Procedura e stentimit është vendosja e strukturave të përbëra nga materiale të ndryshme në arteriet koronare që janë të ngushtuara apo të mbyllura. Ajo bëhet kur qarkullimi i gjakut pengohet në mënyrë të tillë që rrezikon zemrën,” tregon Dr. Gorani.
Por ajo që po e shqetëson më shumë mjekun me përvojë është numri në rritje i pacientëve të rinj me probleme kardiake. “Është e çuditshme, por gjithnjë e më shpesh po hasim në raste të moshave të reja. Në vitin 2017 kam trajtuar një djalosh vetëm 23-vjeçar me bllokim të arterieve. Kur bëmë koronografinë, pamë se njëra nga arteriet ishte mbyllur shumë më herët dhe iu desh vendosja e stentit,” tregon ai.
Sipas Dr. Goranit, faktorët kryesorë që çojnë te këto probleme janë kequshqyerja dhe përdorimi i substancave narkotike. /Gazeta Shneta/
Për më shumë ndiqni videon më poshtë: